A rast îro min dê mijarake din binivîsanda lê aliyên min ên rojnamegerî û meyla min a parastina mafên mirovan nehişt. Vê hefteyê emê bala xwe bidin mafên mirovan...
Mesele ji vir dest pê dike: Ji bo yên nizanin "Rûdawê daxuyaniyeke weşand û got ku li Deriyê Sêmalka nûçegîhana wan dema dixwest here Rojavayê Kurdistanê Asayîşa Rojava êrîşê wê kiriye, li wê xistiye" û tiştên jê zêdetir jî gotin...
Gelek kesî, rojnamegerên me yên ji Bakur jî têde ev bûyer derxistin pêş (di nav qada tora civakî de) û her yekî ji aliyek ve bûyer şermezar kir.
Em niha xal bi xal li meseleyê binêrin:
Daxuyaniya Rûdawê bi kurtahî wekî ya li jor me qal kiriye. Lê agahiyên ji Rojava tên bûyerê bi awayekî din vedibêjin.
Piştî min ev daxuyanî dît min mêze kir ka kesên ji Rojava çi dibêjin (li nav tora civakî)... Yekî wisa nivîsîbû (bi kurtahî): "Ev șanoya qedexekirina derbasbûna sînor ji her du aliyan ve her roj dubare dibe, tevî ku ji mafê her kesî ye, her wext derbasî welatê xwe bibe û xelk û malbata xwe bibîne. Ji xwe meseleyên lêdan û mêdanê hemî derew in, tenê qedexekirina derbasbûnê çêbûye û ew jî gereke tu caran ji her du aliyan ve jî çênebe."
Min xwe negirt, ji ser hevalekî re xwest raste rast ji Rojava agahî bigirim. Ev agahî hatin:
"Asayîşê ew îşkence nekiriye. Wê xwe avêt erdê û kincê xwe qetandiye.
Ew keçik berê jî hatibû Rojava. Dema vegeriya bû li ser Rûdawê gotibû 'YPG û DAIŞ bi hev re ne. Tenê Asayişê jêre got veger Başûr. Ew planek e. Asayişê dest nedaye."
Tiştên ez ji Bakur ve fêm dikim; Deriyê Sêmalka her gav bûye pirsgirêk. Gelek caran ji aliyê Rêveberiya Başûr ve hatiye girtin. Aliyê Rojava jî wisa diyar e jê ne kêm e, kesên nexwaze nahêle bikevin hundir. Ji her du aliyan ve jî ev meseleya rexnekirinê ye, ne meseleya provekirinê ye. Divê mirov her du aliyan jî baş rexne bike; ji ber ku tu asayîş (çi yê Başûr, çi yê Rojava) ne xwedî maf e ku nehêle kurdek li nav welatê xwe bigere.
Li vir aliyê mafên mirovan derdikeve pêş ku yek jê jixwe me got kes nikare pêşî li kesî bigire ku nehêle kurdek ji bajarekî here bajarê din. Tu dixwazî ji wî bajarî be yan nebe, ji wê parçeyê be yan nebe ne xem e.
Aliyê din ê mafên mirovan e jî ev e: Çi nûçegîhana Rûdawê, çi kesek din, kesek ji rêzê, dixtorek, parêzerek, mamosteyek, gundiyek, karkerek, kî dibe bila bibe, asayîş (yê kîjan parçeyê dibe bila bibe) nikare lêxe, lê îşkence bike. Helbet ez wekî kes bi Rûdaw û daxuyaniyên wê ne bawer im, ligel ku ev agahiyên li jor gihîştin min jî, bi ya min pêdivî bi daxuyaniya fermî ya Asayîşa Rojava heye ku meseleyê zelal bike. Ger hebe bi rastî îşkenceyek divê lêborînê bixwaze, nebe jî divê mesele zelal bibe. Belkî Asayîş pêdivî pê nabîne jî nizanim... Bersiv li cem wan e.
Û gotinek din a ji bo mafên mirovan jî ev e: Her rojnameger (çi ji Başûr be, Rojava be, Bakur be yan ji cihek din) divê her gav li dijî binpêkirina mafên mirovan be. Kesên din jî, yên ku bûyeran şermezar dikin, divê ji her alî ve, bêyî li nasnameya kes, li partî û rêxistinên kesan binêrin bûyeran şermezar bikin. Mînak di vê bûyerê de gelek kesan (rojnameger jî di nav de) ev meseleya lêxistina nûçegîhana Rûdawê belav kirin û şermezar kirin, lê dema li Başûr rojnameger Aysel Avesta hat binçavkirin û çend rojan di bin çavan de ma, dîsa dema li Duhokê rojnameger Vedat Hisên Elî hat kuştin qet derneketin û bûyer şermezar nekirin. Yên ku bixwazin bibêjin tu ji kî re dibêjî, bila li roja wan bûyeran û li parvekirinên xwe yên wê rojê yên di faceyê de binêrin, dê diyar bibe ku ez ji kî re dibêjim.
Bi kurt û kurmancî wekî dubare:
Em mecbûr in li her parçeyê, desthilatdarî kî dibe bila bibe, hûn bixwazin PDK-YNK-Goran be, bixwazin PYD be, yan dewleta Tirkiyeyê be, wekî rojnameger, wekî nivîskar, an jî wekî kesek ji rêzê em mecbûr in li dijî binpêkirinên mafên mirovan derkevin. Di warê mafên mirovan de mirov nikare li nasname, li reng, ziman û neteweya mirovan binêre.
Di bûyera dawî de jî wisa. Mirov ji Rûdawê, ji hin rêvebiriyan hez neke jî li hemberî wan neheqiyek ger çêbe mecbûr e wan biparêze. Mirov bi gavên wisa dibe mirov. Ger tenê em kesên nêzî xwe biparêzin, tenê xwedî li mafên wan derên wê çaxê tu ferqa me û yên din namîne.
.jpg)
.jpg)
