Ew jî yek ji mêvanên festîvalê bû, mîna min.
Bi qasî ku bi erebî diaxivî kurdek bû, kurdekî feylî.
Mixabin ew jî wekî qedera hevbeş ya birek ji cih û ji warbûyên ji ser axa bav û kalan, di sala 1960’î de li Bexdayê ji dayikê dibe…
Ez bibêjim nan û av, hûn bibêjin ax û tav dike ku zarokê li mişextiyê çavên xwe li jiyanê vekirî, piştî salên bi azar û miştbêrî berê xwe bide axa malbatê jê barkirî.
Her nexweşî dermanekî xwe hebe jî, hesret bi dîtinê, bi çavpêketinê dikewe.
Û kurmê fîraqê, yê dûrketina ji axê, ji yarê, ji dost û nasan… bi hinavan re mêlaka mirovî jî diherijîne.
Ma ne, Feqî ye yê gotî ‘Bayê fîraqê agir e’!
Agir bi avê vemire jî, hesret di tifika hinavên mirovê hesretkêş de agirdanka Zerdeştekî ye, ku her venamire!
Ev agir e gelo, dike ku mirov henaseya dawîn li ser axa xwe ya jê dûrketî bide û bextewar bimire?
Jiyîn li ser axeke ku jîngeha bi hev re jiyînê be jiyîn e.
Doktor jî, ji vê ferasetê piştî salên dûdirêj, her du kurmikên giyankevêj: hesret û mişextiyê wekî du sêwiyan ji hembêza xwe davêje kolanên tax û tarên Bexdaya zaroketiya xwe û berê xwe dide Duhoka Dasînya.
Duhoka ku du çiya bajarê qedîm û nişteciyên kevn û nû hewandine ser kanî û sifreya pevrejiyînê, kurekî xwe yê ji dûrhatî, bi germahiya dil dê nefermînê, dê rûnenîne li rex zêrç û zarok, li cem zanyar û nasyar û nivîskarên xwe!
Duh mêvanê kê bû, nizanim; lê îro Dr. Macit el Heyder mêvanê Yekîtiya Nivîskarên Kurd tayê Duhokê ye.
Kêfxweşî û dilşadiya xwe bixwaze vedize jî ji beşdarên li holê, bi dêmên xwe yên ku ji kela dil sorbûyî, bi awirên xwe yên her nerîn bi çirûsîn nekare veşêre.
Coş, kelecan, dilşadî tê veşartin!!
Gava ku çavên min dikevin çavên wî, pirsa bi helbestî ya ku Nazim Hîkmet di helbesta xwe de ji Abîdîn Dîno kirî tê bîra min: “Tu dikarî bextewriyê biwênînî, Abîdîn!”
Abîdîn bextewrî newênandibe jî ji Nazim re, niha vê kêlîkê li hola Yekîtiya Nivî
skarên Duhok Dr. Macit el Heyder li rex Hesen Slêvanî rengê kevalê bextewariyê ye.
Kek Hesen xêrhatineke germ dide mêvanan û paşê derbarê jînenigarî û berhemdariya semînervan de kurteagahiyekê dide.
Piştî pêşkêşiya Serokê Yekîtiya Nivîskaran Hesen Slêvanî semînera Dr. Macit el Heyderî dest pê dike:
Werger û girîngiya wergerê: Ji zimanê îngilîzî ji bo zimanê erebî; helbestên di dîwarekî re derbasbûyî…
Mixabin, ev semînera sudewar a ku ji bizavên heftiyane yên Yekîtiya Nivîskarên Kurd e, bi zimanê erebî dest pê dike…
03.12.2008/ Duhok
arjenari99@yahoo.com
.jpg)
