.jpg)
Demokrasî û jiyana bajarî, bajarvanî, heya heyamê geşedanên teknolojîk yên bê ser û ber, du têgeh bûn ku bi azadiya takekes re seknekê der dibirin. Li dû geşedanên teknolojîk û qewimînin cuda, girîngiya pirdengiyê a di demokrasiyê de derket pêş, pê re jî têgeha mexdûriyetê xwe da der; bi wê têgehê re rastiya nasnameyên cuda derket meydanê. Êdî azadiya takekes bi tena serê xwe ne bes e, azadiya nasnameyan yek ji şertên jiyana bajarî an jî demokrasiyê ye. Ev rastî ku bi têgehên wekî pirhêlî-pirdengî tê derbirîn, bi saya ragihandinê, rê da pirsekê; jiyaneke çawa? Ev pirs ji bo mirovê di nav bêtonê de dijî, ji alî aborî ve li jêr an jî li navberê ye, pirseke muhîm e ku pirsê rê da bê dorhêl ji bo wî/wê çiqas muhîm e. Bi gotineke din bi qasî nan û avê însan hewa û hêşînahiyê jî muhîm dibînin.
Li gorî lêkolîner û zanyaran problema herî mezin a ku mirovahî di demên pêş de pê re mijûl be problema dordorê ye.
Li ciyek ku problemên mezin hebin problemên din piçûk têne dîtin. Ev rastiyek jiyanê be jî divê em ji bîr nekin ku problemên piçûk bi demê re mezin dibin. Ji lewre bi daxwaza demokrasiyê re gavên ji bo dorhêlek xweş muhîm in.
Hin gav û pratîkên jiyanê hene ku, bi awayek suriştî û xweş, teşe didin zîneta însan. Mînak, li gund bi çi mebestî be jî ger di malekê de pisîk bê xwedî kirin an jî kûçik were xwedî kirin, bi awayek zarokên wî malê jî bi wan ajalan re mezin dibin û ji ajalan hez dikin.
Ev ji bo daran jî wisa ye; ger li pêş malê aj hebin zarok pê re mezin dibin. Gelo dar ajotin an jî aj çinandin di pratîkê de çiqas ji bo me problem e? Texmîn dikim ku hin kesên biha dibêjin, tu li derdên ku li vê erdnîgariyê xwe didin der binihêre, tu li babetên ku nivîskarên me mijûl dikin binihêre! Ne me got ev rastiyek jiyanê ye ku bi problemên mezin re yên piçûk jî hene. Bi qasî çareserkirina problemên mezin pêşîlêgirtina problemên piçûk jî muhîm e.
Gelo, her malek hema sê ajên mêweyan biçine ê îstatîstîkek çawa derkeve pêşberî me? Ji bo vê têkoşîn jî ne lazim e, ê zarok û aj pev re mezin bin.
Ji bajarvanî û demokrasiyê madetir niha ekolojî û demokrasî li hev dikin. Ji bo nifşên pêşerojê yek ji standardên demokrasiyê ê nêzikahiya li ekolojiyê be. Nêzikahiya li ekolojiyê ya rast wê tehemilê jî bi xwe re bîne.
.jpg)
