Van rojan xew bi te xweş e… Bihar e. Jîn û vejîn e. Bi qasî ku hatina adarê dibe destpêka xemilandina dinyayê, ew qasî jî mirov dixe bin bandora xwe. Bêhna derve xweş e. Tu paceyên odeya xwe vedikî ku bêhna biharê xwe li hundir bigre. Pê re pinpinîkek xwe li hundir diqelibîne. Tu lê dinêrî. Rengîn e û pir xweş xwe li ba dike. Kêfa te jê re tê. Piştî ku tu paçikekî bi ser maseya xwe dixî, tu çayekê vedixwî û tu dest bi xebatê dikî. Xebat li tu tiştî nanêre. Ne li biharê, ne li payîzê û ne jî li zivistan û havînê!
Tu bi dengê telefonê re vediciniqî. Wergî te xwe daye karê xwe tu ji vê dinyayê veqetiyayî loma dengê telefonê te vediciniqîne û te vedigerîne tîne vê dinyayê.
Yê ku digere Receb Dildar e. Ku tu navê wî dibînî kêfa te tê. Ev mehek e ku we hev nedîtiye. Tu bi wê kêfxweşiyê dibêjî, “merheba keko!”
Ew dibêje, “Ezê ji te re qala çîrokekê bikim binivîs!”
Tu dibêjî, “serçavan!”
Ji wî heye ku tuyê nenivîsî!
Ew dibêje, “Zilamek hebû. Hat Amedê. Têra xwe li ofîsê geriya. Dû re derket qata şeşan çîrok xwend. Wê rojê vegeriya, çû û hew xuyabû!”
Tu dibêjî, “Rast e. Ev dike bibe mehek ku ez vegeriyame û nehatime Amedê.”
Hûn li hal û wextê hev dipirsin…
Piştî wê dibêje, “Ewê îro helbestvanên jin helbestên xwe bixwînin” û qala organîzasyona ku ji bo wan hatiye kirin dike.
Tu dibêjî, “Erê haya min jê heye. Hem DSM’ê ji min re e-mail avêtibû hem jî di malperan de qal kiribûn. Pir dilê min hebû ku ez werim lê mixabin ji bergî ez dixebitim ez nikarim herim derekê! Wekîlê silavan be!”
Kêfa te tê ku weşanxane li helbestvanên xwe û berhemên wan xwedî derdikeve û dibe pir ji bo ku xwe bigihînin xwendevanên helbestê!
Dû re dibêje, “Pirtûka min a çîrokan ji Avesta derketiye. Sibê jî li qada Newrozê ezê pirtûkên xwe îmze bikim!”
Ev jî kêfa te tîne.
Hem pirtûkxaneya kurmancî dibe xwediyê xwe û pirtûkeke din û hem jî ewê li qada Newrozê pirtûk bên îmzekirin. Tiştekî nuh e û tu bi vê xeberê jî bextewar dibî.
Adar e!..
Mehek pir bi wate ye!..
Adar e; Roja jinên kedkar yê cihanê, Helebçe û Newroz e. Wê ne tenê ev bin ez dizanim…
Newroz tê pîroz kirin û li qadan wê nivîskar pirtûkên xwe îmze bikin!
Newroz e. Bi sedhezaran kes bi yek dengî diqîrin û dixwazin dengê wan bê bihîstin!
Tu dibêjî, “Cejna we pîroz be!”
roniwar@hotmail.com
.jpg)
