Diyarname
Rojnameya almanî ya Suddeutsche Zeitung bi sernivîsa "Li Tirkiyeyê kêşeya kurdan: Eger li vir wisa berdewam bike, wê evder wekî Sûrî lê were" nûçeyek berfireh derbarê rûdanên li bakurê Kurdistanê û Tirkiyeyê weşand.
Rojname di destpêka nivîsê de balê dikişîne ser kuştina rojnamegerê ji Sûrî, Nacî el Çerf ku doh li Dîlokê hatibû kuştin û diyar dike ku jiyana rojnamegerên ji Sûrî li Tirkiyeyê di nava xeteriyê de ye. Her wiha derbarê ewlehiya rojnamegeran de jî bal tê kişandin ku di halê hazir de polîsên tirk hemû enerjiya xwe bi pevçûnên kurdan re xerc dike: "Dewlet dixwaze pêşiya bandora pêşveçûna kurdan li Sûrî li ser kurdên Tirkiyeyê bigire."
Her wiha di nûçeyê de cih ji daxuyaniya parêzer Mehmet Salih Bagata ku li Cizîrê ye hatiye veqetandin. Bagata balê dikişîne ser rewşa dawî ya li Cizîr û bajarên din ên kurdan û vê tespîtê dike: "Eger wisa berdewam bike, evder dê wekî Sûrî lê were".
Rojnameya navdar a alman destnîşan dike ku êdî gelek kurd xwedî wê hestê ne ku ş^sdeta niha ji ya salên 90´ê derbas bûye.
Di berdewamiyê de tê gotin ku destpêka vê salê di asoyê de çareseriya meseleya kurdan dihate dîtin lê belê ev çareserî niha zêde dûr dixuyd. Derbarê gurbûna daxwaza kurdan a xweseriyê de jî rojname vê agahdariyê dide: "KCD´ê roja yekşemê daxuyand ku kêşeyên rû didin tenê dikarin bi çêbûna xweseriyê li herêmên kurdan werin rawestandin. Di daxuyanî de tê gotin ku serhildan banga xweseriyeke zêdetir li herêmê ye."
Digel agahdariya bertekên hikameta tirk a derbarê danezana KCD´ê de, rojname balê dikişîne ser wê yekê ku herî gelek cîhadî ji van rûdanên navbera Tirkiye û kurdan de sûd werdigirin û nûçe wiha diqede: "Hata niha yên li dijî DAIŞ´ê herî serketî kurd in."
Wergera ji almanî: Zekî Ozmen