AMED - DÎHA

Cemiyeta Rojnamevanên Azad ku êrîşên li ser xebatkarên Çapemeniya Azad şermezar kir, êrîşên hatine kirin wekî koordînekirî pênase kir û wiha got: "Ev êrîşên bi koordînekirî û yên hov nikarin rê li ber kar û xebatên me yên birûmet bigirin. Ew alîkarî û hevkarên çeteyên DAIŞ'ê ne. Fêr û ferasata xwe ji salên 90'î hizbilkontra digirin. Di vê demê de jî hevalên me li ber çavan di nava kuçeyan de raste rast dihatin qetilkirin. Ev êrîşkar berdewama wan hêzên çeteyên kontra û JÎTEM'ê ne"

Cemiyeta Rojnamegerên Azad, êrîşên li hemberî xebatkarên Çapemeniya Azad û şehadeta Rojnamevan Ehemed Sado (Mazlum Bagok) ku li Rabîayê di encama şerê bi çeteyên DAIŞ'ê de jiyana xwe ji dest dabû bi daxuyaniyekê şermezar kir. Daxuyanî li ber Rojnameya Azadiya Welatê ya di avahiya KURDÎ-DER'ê de bi tevlibûna saziyên Çapemeniya Azad, Rojnameya Azadiya Welat, DÎHA, JINHA, Ozgur Gundem, ÎMC-TV, Gun TV, Pel Prodîksiyan û xebatkarên KURDÎ-DER'ê pêk hat. Edîtorê Rojnameya Azadiya Welatê Ramazan Olçen li ser navê saziyan daxuyanî xwend. Olçen beriya daxuyaniyê, bi bîr xist ku çar xebatkarên Çapemeniya Azad ku di nav de 2 xebatkarên wan ji hene ji hêla alîgirên çeteyan ve hatine kêrkirin û ev yek şermezar kir. 

'Di bin kirasê îslamiyetê de êrîş dikin'

Olçen, di destpêka daxuyaniyê balkişand ser êrîşên çeteya DAIŞ'ê yên li ser Kobanê û got ku DAIŞ di bin kirasê îslamiyetê de bi awayekî hov êrîşan pêk tîne. Olçen, anî ziman ku çeteyên DAIŞ'ê ji bo şikandina morala kurdistaniyan hewl dide Kobanê bi dest bixe û da zanîn ku hêzên navnetewî van êrîşan di nava bêdengiyê de dişopînin. Olçen, derbirî ku hêzên navnetevî bi vî avayî piştgiriyek mezin didin çeteyan û Tirkiye jî ji van hêzan kêmtir namîne û piştgiriyek xurt dide van çeteyên hov. 

Berxwedana hêzên kurd berdewam e 

Olçen di berdewamê de balkişand ku hêzên YPG, YPJ, HPG, YJA STAR û hêzên kurdistanî bi berxwedaneke bêhempa li hemberî van êrîşên faşîzane û hova dadiwestin û wiha domand: "Armanca wan ew e ku li herêmên xwe aştî û aramî ava bikin. Ji bo ku ax û welatê xwe radest nekin, din ava berxwedan û têkoşînek mezin de ne."

Çapemeniya Azad li hemû eniyên şer de ye 

Olçen da zanîn ku di bin van êrîşên giran de xebatkarên Çapemeniya Azad ku bi şîara "Ji rastiyan tu carê tawîz nayê dayîn" dixebitin ji Kobanê bigre heta Rabîa, Gazza, Kerkûk û Mexmûrê di hemû eniyên şer de ji bo rastiyê ji raya giştî re ragihînin li gel hemû bedelên giran xebata xwe dimeşînin. Olçen, bi bîr xist ku demek beriya niha di encama êrîşên çeteyên hov yên li hemberî Mexmûrê de Rojnamevan Leyla Yildizhan (Denîz Firat) û çend roj beriya niha jî li eniya şer ya Rabîayê Rojnamevan Ehmed Sado (Mazlum Bagok) jiyana xwe ji dest daye. 

'Êrîşa hevalbendên DAIŞ'ê'

Olçen dîsa got, li ser sînorê Pirsûs-Kobanê xebatkarên Çapemeniya Azad bûne hedefa leşkerên tir û hatin binçavkirin û wiha pêde çû: "Weke tu tê zanin îro li tevahiya Bakurê Kurdistanê ji bo piştgirîdayîna berxwedana Kobanê, li her bajar û navçeyan çalakî û xwepêşendan hatin lidarxistin. Di dema ku li taxa 5 Nîsan a navçeya Rezan a Amedê hevalên me nûçe dişopandin rastî êrîşa havalbendên çeteya DAIŞ'ê ya bi kêran hatin. Di encama êrîşê de Nûçegîhanê Rojnameya Azadiya Welatê Bişar Durgut ji 8 cihên xwe hate kêrkirin. Dîsa di encama heman êrîşê de 3 hevalên me ên xebatkarê Azadiya Welat û JINHA'yê jî birîndar bûn."

'Êrişên koordînekirî'

Olçen diyar kir ku bi taybet ew van êrîşên dijexlek û hiqûqe ku li ber çavê polîsên tirk pêk hatiye lanet dikin û wiha dirêjî da: "Ev êrîşên bi koordînekirî û yên hov nikarin rê li ber kar û xebatên me yên birûmet bigirin. Ew alîka û hevkarên çeteyên DAIŞ'ê ne. Fêr û ferasata xwe ji salên 90'î hizbilkontra digirin. Di vê demê de jî hevalên me li ber çavan di nava kuçeyan de raste rast dihatin qetilkirin. Ev êrîşkar berdewama wan hêzên çeteyên Kontra û JÎTEM'ê ne"

Berê nikarîbûn îro jî nikarin

Olçen herî dawî got ku çewa van hêzên tarî wê demê nekarî xabata Çapemeniya Azad asteng bike, niha jî nikare û wiha dawî li axaftina xwe anî: "Weke Çapemeniya Azad em ê tu carî dev ji vê doza xwe bernadin û tim vê têkoşîna xwe ya bêhempa û birêmet bidin meşandin."

Girse piştî daxuyaniyê bi çapikan belav bû.