Diyarname

Hevgirtina Rewşenbîrên Rojavayê Kurdiskanê (HRRK) daxuyaniyeke nivîsî weşand, bal kişand ser trajediya Şengalê, got ku îro li her derê li dijî kurdan êrîş pêk tên û xwest kurd bi tifaq û lihevkirinê tevbigerin.

HRRK'ê di daxuyaniya xwe de got ji her alî ve hêzên tarî derûdora welatê kurdan girtine û di çarçova şerekî demdirêj û dijwar de, ji Serê Kaniyê, Hesekê û Kobanî hetanî bi Kerkûk û Şingalê dane ber xwe û wiha dom kir: "Wisa xuya dike ku roj bi roj xeleka şerê li dijî hebûna gelê Kurd berfirehtir dibe. Ji hêlekê ve van rûdanên li Şingalê em xemgîn kirin û pêdiviya parastina deverên pîroz ên kurdan anîn holê, ji hêla din ve jî hevkariya bi sînor a di navbera hêzên çekdar ên Kurdan de li hember hêzên hovîtî û reşayiyê şabûneke mezin xiste dilê me û dilê hemû kurdan li Kurdistan û li seranserê cîhanê.

Li hember vê hevkariya dilxweşker, alavên ragihandinê yên girêdayî hêzên kurdan navber nedan şerê bê sûd û bê encam ê li dijî hev. Vê yekê tevliheviyeke mezin aniye meydanê û rê li ber gelek pirsên tirsnak vekiriye. 

Ji ber vê, em di Hevgirtina Rewşenbîrên Rojavayê Kurdistanê de, bala hemû aliyên kurd dikşînin ser vê rastiyê ku, şerê îro ne şerekî weha ye ku dijî partiyeke kurdî yan aliyekî kurd e, lê belê şerekî dijî hemû kurdan e û rêlibergirtina bidestxistina mafê çarenûsî ye. Wisa jî dijmin hem li Rojava û hem li Başûrê Kurdistanê yek e.

 Ji ber vê em hevrêzî û hevkariya hêzên kurdan ên çekdar wekî pêdiviyek e bi lez dibînin û bang li van hêzan dikin, "Hêzên Parastina Gel YPGe" û "Pêşmergeyên Kurdistanê", ku têkiliyên xwe yên bi hev re xurttir bikin û ji asta tektîkî ber bi asteke stratejîk û demdirêj ve bibin. 

Her weha em bang li televizyon û alavên ragihandinê yên bi ser hemû aliyan ve dikin, da ku vî şerê zirarker û qirêj li hember hev bidin rawestandin û gotara xwe ya ragihandinê ber bi asoyên amadekirina zemîna hevkarî, hevrêzî û jihevnêzîkbûna hêz û aliyên kurd ve, bilind bikin. 

Ev rê ya bi tenê ye li ber gelê me, ku karibe hem birînên Kobanî û Şingalê bilezûbezeke mezin derman bike û hem jî Kurd li ser xaka xwe serbestî, azadî û serxwebûna xwe bidestbixînin.

Hêviya me ji hemû aliyên kurd û bi taybetî ji cihên biryargirtinê ew e, ku guh bidin vê banga me ya ji dil; hem di qada şer de bêhtir ji hev nêzîk bibin û hem jî di qada çapemeniyê de bi sempatî û bi belavkirina çanda tifaq û lihevkirinê, tevbigerin."