HEWLÊR

Serokatiya Parlamentoya Başûrê Kurdistanê 11 roj piştî êrîşên çeteyên DAIŞ’ê yên li ser Kobanê, daxuyaniyek da û êrîş şermezar kirin. Serokatiya parlamentoyê banga piştgiriyê li partiyên kurd û rêxistinên navneteweyî kir. 

Serokatiya Parlamentoya Kurdistanê roja 13'yê mehê tekildarî mijarê daxuyaniyek weşand. Di daxuyaniyê de hate diyarkirin ku êrîş bi pilanekê û bi çekên giran ên ku komên çekdarî li Iraqê dest danîne ser têne pêkanîn.

Di daxuyaniyê de berxwedana ku li Kobanê tê nîşandan silav kir û ji hemû hêzên siyasî yên Rojavayê Kurdistanê xwest ku nakokiyên xwe bidin aliyekî û di van şert û mercên dijwar de bibin yek û rê nedin armancên dijminên kurdan.

Di daxuyaniyê de her wiha ji Neteweyên Yekbûyî, Yekîtiya Ewropa û Yekîtiya Ereban jî hate xwestin ku alîkariyên mirovî bilez bigihînin Rojavayê Kurdistanê û rê nedin karesateke mirovî û komkujiya li dijî kurdên Rojava.

Di dawiya daxuyaniyê de, ji hikumeta Herêma Kurdistanê û hêzên siyasî yên perçeyên Kurdistanê jî hate xwestin ku piştgiriya kurdên Rojavayê Kurdistanê bikin.

Daxuyaniya parlamentoyê piştî banga Rêberê PKK'ê Abdullah Ocalan a ji bo Kobanê kiribû, hate dayîn. Ocalan bang li hemû ciwan, gel û saziyên kurdan, hêzên demokrasiyê kiribû ku li dijî çeteyên mirinê ji bo rûmeta xwe ya netewî seferber bibin. Ocalan her wiha xwestibû ku kongreya netewî ya kurd jî di zûtirîn demê de kom bibe.

ANHA - Diyarname