SEDAT SÛR - MÊRDÎN
Li navçeya Mêrdîn Kerboranê, derket holê ku sê kesên piştî bûyera kuştina sercerdevanê berê Mehmet Ûgûrtay bi îfadeya şahidê veşartî hatine girtin, di encama komploya polîs û sîxur de hatine girtin. Tê gotin ku şahidê veşartî, sîxurekî polîsan ê li navçeyê karê narkotîk û fûhûşê dike ye. B.Ç. beriya girtinan, der barê vê tora polîs û sîxur de agahiyên balkêş da ANF'ê.
Li navçeya Kerboranê, piştî ku roja 28'ê Gulanê sercerdevanê berê û endamê HUDA-PAR'ê Mehmet Ûgûrtay hat girtin, endamê Meclîsa Şaredariya Kerboranê yê BDP'yî Mehmet Şerîf Toprak (47), kurê wî Omer Toprak (19) û xwendekarê dersxaneyê Mehmet Emîn Ogûz (17) li ser îfadeya şahidê veşartî, weke kiryarên bûyerê hatin girtin. B.Ç. ê nexwest navê xwe aşkera bike, beriya girtinan der barê xebatên polîs û sîxuran de agahiyên balkêş da. Ev agahî îddîayên malbata Toprak û rayedarên BDP'ê ku digotin "girtin, komployek bi hevkariya polîs û sîxuran e" xurt dike.
Kekê endamê Meclîsa Şaredariya Kerboranê yê BDP'ê M. Şerîf Toprak ê hat girtin Mûrat Toprak jî diyar kir ku girtiya birayê wî komployeke polîs, cerdevan û sîxur a ji bo BDP û HUDA-PAR werin pêşberî hev bû. Toprak got, "Divê ev bûyer demek ji ya din zûtir bê ronîkirin. Ti eleqeya birayê min, birazê min û zarokê bi navê M. Emîn bi vê bûyerê re nîne."
Hevşaredar Zeynep Sîpçîk û Sînan Akan dan xuyakirin ku ewê dozê bişopînin û diyar kirin ku emniyet li şûna aşkerakirina kiryarên rastî yên vê bûyerê, dane dû komployê.
‘ROJEK BERIYA OPERASYONA BINÇAVKIRINÊ CIVÎN TÊ LIDARXISTIN’
B.Ç. ragihand ku beriya binçavkirina her sê kesên mijara gotinê, roja 6'ê hezîranê li gundê Xelîlan ê li nêzî mala M. Reşît Toprak li mala kesekî bin avê S. civînek tê lidarxistin û anî ziman ku di vê civînê de du polîsên sivîl, T.V. û sîxurên polîsan ên di bûyerê de weke şahid hat nîşandan amade bûn. B.Ç. got, "Civîn ji bo hilbijartina kesê ku weke berpirsyarê bûyera Mehmet Ûgûrtay were nîşandan, hat lidarxistin."
‘DESTPÊKÊ KESEKÎ BI NAVÊ SULEYMAN HAT HILBIJARTIN’
B.Ç. îddîa kir ku di civînê de destpêkê li ser navê kesekî bi navê Suleyman ku li navçeyê weke welatparêzekî tê zanîn hatiye axaftin û diyar kir ku ji ber malbata Suleyman malbateke xwedî bandore bi gotina 'dikare bibe bela li serê me' dest ji wî tê berdan.
B.Ç. da xuyakirin ku beşdarên civînê dûre li ser navê M. Reşît Toprak li hev kirine û got, "Ji ber ku M. Reşît Toprak zêde kesekî xwe tineye û hem jî ji ber endamê Meclîsa Şaredariya Kerboranê yê BDP'yî ye, tevgera siyasî ya kesê bê kuştin û BDP bi vê rê dikarin li hemberî hev rabin. Bi vî rengî biryar dan berprisyariyê biavêjin stuyê M. Reşît Toprak, kurê wî Omer Toprak û M. Emîn Ogûz."
B.Ç. ragihand ku di civînê de li ser sûcdariya li wan bê kirin jî hat axivîn û got, "M. Emîn weke tetîkkêş, Omer weke alîkar û M. Reşît Toprak jî weke organîzator hatin hilbijartin. Her wiha ji bo ekîba operasyonê bike, li derdora malê, bi wesayîteke ji camên tarî, keşif tê kirin."
‘KESÊ BI NAVÊ H.G. KUJER E?’
Detayeke din a di nava agahiyên B.Ç. de balê dikşîne pirsa "Gelo yên ev civîn pêk anînen kujer in yan jî pêwendiya xwe bi kujer re heye?" tîne bîra mirovan. B.Ç. diyar kir ku piştî kuştina Ûgûrtay dayika ciwanekî bi navê H.G. yê li navçeyê dijî gotiye, "Ev sê heftene tiştek hatiye serê kurê min, psîkolojiya wî xera bûye. Piştî girtina sê kesan der heqê bûyerê de jê re gotiye, Polîsê werin min jî bibin, nasnameya min biçirînin û biavêjin."
B.Ç. axaftina xwe wiha dewam kir: "Di vir de tişta herî balkêş dema birazê wî S. ê civîn li mala wî hat lidarxistin û malbata wî xwest H.G. rakin nexweşxaneyê, xalê wî yê bi navê S. li hemberî vê bûye asteng. Xalê wî çima nahêle biçe nexweşxaneyê? Gelo ditirsin ku dema bi psîkologan re biaxive wê hin tiştên veşartî bêje? Dibe ku H.G. tetîkkêş be."
“TI DIJMINAHIYA ME BI KESÎ RE TINEYE”
Mûrat Toprak bibîr xist ku du hefte piştî kuştina sercervan Mehmet Ûgûrtay di sibeha 5'ê Hezîranê de di serdegirtina malan de bira û birazê wî ji aliyê polîsan ve hatine binçavkirin û diyar kir ku piştre Mehmet Emîn Ogûz hatiye binçavkirin. Toprak got, "Piştî ku min serdegirtin bihîst, qet nehat hişê min ku pêwendiya xwe bi bûyera kuştina sercedevan heye. Em vî kesî nas nakin û ti dijminahiyeke me pê re nîne. Vî kesî jî ti zext li me nekiriye."
MALBATA ÛGÛRTAY JÎ RAGIHAND KU YÊN HATINE GIRTIN KRIYAR NÎNIN
Mûrat Toprak da xuyairin ku malbata sercerdevanê hat kuştin jî ragihandiye ku ew ne bawer in yê hatiye girtin kiryarên bûyerê ne û anî ziman ku malbata Ûgûrtay gotiye, "Em ne bawerin ku van kesan ev bûyer kirine. Ji bo ser vê bûyerê binixumînin, ev kes bi zanebûn hatine hilbijartin û berpiryarî xistine stuyê wan."
“YEKANE SIPARTEYA POLÎS ŞAHIDÊ VEŞARTÎ YE”
Mûrat Toprak da zanîn ku bira û birazê wî û M. Emîn Ogûz piştî lêpirsîna şevekê li Muduriyeta Emniyetê ya Mêrdînê roja 6'ê Hezîranê birine Dozgeriya Komarê ya Kerboranê û dûre hatine girtin û anî ziman ku polîsan di binê çavan de gotine 'we cînayet kirine'. Toprak destnîşan kir ku yekane siparteya polîsan şahidê veşartî ye û got, "Ti rûbirûbûn nehat kirin. Bi tenê li ser îfadeya şahidekî veşartî, lêpirsîna wan hat kirin."
“BI DÎTINA ME ŞAHIDÊ VEŞARTÎ SÎXURÊ POLÎSAN E”
Mûrat Toprak diyar kir ku kesê weke şahidê veşartî hatiye pêşkêşkirin ew difikirin ku kesekî li Kerboranê ev demeke dirêje karê eroîn û fûhûşê dike û bi polîsan re hevkariyê dike ye û got, "Eger ew kesê ku em jê bi guman in, hingî ew kes li Kerboranê karê narkotîk û fûhûşê dike. Bi salane bi dewlet û polîs re dixebite. Şahidê veşartî gotiye, 'Bi şev çûm mala M. Şerîf Toprak. Li wir Şerîf Toprak ji kurê we re got, di destê sercerdevan de hin ewraq hene. Eger ew ewraq bikeve destê dewletê wê ji bo me nebaş be.' Axaftineke bi vî rengî yan jî belge û delîleke wiha li malê nehatiye kirin, nîne. Ev îfade bi temamî derew e."
Toprak destnîşan kir ku ev yek komployek siyasî ye û bi vê re hatiye xwestin ku BDP û tevgera siyasî ya kesê hatiye kuştin endamê wê bû bên pêşberî hev.
Toprak xwest bûyer bê ronîkirin û anî ziman ku ewê dest ji şopandina bûyerê bernedin. Toprak ragihand ku ewê alîkariya hiqûqî ji ÎHD'ê bixawaze.