Diyarname

Piştî ku gotin BDP'ê Agirî bi dest xistiye, AKP'ê îtîraz kir. Niha careke din jimartin çêdibe. Îro gere encam zelal bibe. Gel li ser piyan e. Her derê Agirî polîs kom bûne.

YSK'ê bi awayekî fermî ragihandibû ku BDP li Agirî bi ser ketiye. Li ser vê yekê AKP'ê nerazîbûn nîşan da û çend caran deng hatin jimartin. Di serî de hezar deng ferq hebû, di her jimartinê de ev hejmar daket. Herî dawî YSK'ê ji rayeradên BDP'ê re gotin ku bi 10 dengan we şaredarî bi dest xistiye. Li ser vê careke din AKP'ê îtîraz kir. Cîgirê Serokê Gşitî yê AKP'ê Huseyin Çelik di televîzyonê de got: "Li Agirî niha BDP bi 10 dengan li pêş dixuye. Duh êvarê BDP'yiyan zor hevalên me kiriye. Li Agirî encam dibe ku biguhere." 

Bi sedan kes nerazîbûn li hemberî van gotinan nîşan dan û li Xaçerêya Dortyolê hatin ba hev û nerazîbûn nîşan dan.

Niha nava bajêr li gelek deveran polîs kom bûne. Li ber Şaredariya Agirî jî. 

Hevserokê Şaredariya Agirî Sirri Sakik li Xaçerêya Dortyolê axivî, nerazîbûn n^şianî gotinên Çelik da û got: "Me zor li kesî nekiriye. Yê wan hêzên wan ên ewlehiyê, dozger, dadgerên wan hene. Bila derkevin bibêjin, ka me zor li kî kiriye. Gere ew hurmetê nîşanî vîna vî gelê bidin. Dixwaze sabote bikin. Emê li vê derê bibin şaredarê her kesî. Emê dersa demokrasiyê bidin wan."

Li aliyê din li ser nerazîbûna AKP'yiyan hat gotin ku îro dê dîsa dest bi jimartina dengan bê kirin. Li bajêr tansiyon bilind e.