Diyarname

Berendamê Hevserokatiya Şaredariya Tekmana Erzeromê Ali Sait Firat got ku li Tekmanê ewê sedî 80 dengan bigirin.

Di hilbijartina 2009'an de DTP'ê li Tekmanê sedî 33,1 girtibû û bûbû duyemîn: Berendamê AKP'ê jî bi sedî 34,8 bûbû yekemîn û şaredarî bi dest xistibû. Di hilbijartina 30'ê adarê de BDP'ê li Erzeromê 4 şaredarî dane ber xwe ku bi dest bixe. Yek ji wan jî Tekman e.

Berendamê Tekmanê Firat agahî da nûçefîhanê ANF'ê Ali Guler û bi xwe bawer axivî. Li gor Firat bi sedî 80'ê dengên tekmaniyan dê şaredarî bi dest bixin. Firat wisa got: “Kurdên li Erziromê dijîn di bin zextan de ne. Heta niha bi awayekî cidî di bin zextan de bûn. Xwe nekaribûn îfade bikin. Lê niha rewş cuda ye. Kurd xwedî li nasname û nirxên xwe derdikevin. Ji bo vê têkoşînê didin. Ji bo wê jî emê herî kêm 4 naveçeyên Erzeromê qezenc bikin. Lê du navçeyên zêde em bi hêzin hene. Qereyazi û Tekman. Di hilbijartinên borî de jî herî zêde me deng ji wir girtin. Gelê Tekmanê eleqeyeke mezin nîşanê me dide.  Li dijî partiya me kelecaneke wan ya mezin heye. Ev li her derê Tekmanê wisa ye. Di hilbijartinên 30’ê adarê de emê ji 80’ê dengan bigirin û bibin partiya yekemîn."

Alî Saîd Firatê ku yek ji neviyên Şêx Seîd e, balkişand ser  kesên din yên ji malbatê ku gotibû em piştgiriyê nadin BDP’ê û wiha got: “Malbata me mezin û fireh e. Yê ku ew daxuyanî daye Parêzer Abdurahîm Firat e. Vî kesî berê di ÎHD û HADEP’ê de xebat meşandiye. Lê ji ber qoltix û mewkiyê tevli AKP’ê bû. AKP jî ev du dem e dibêje ‘emê te bikin parlamenter’ û dixapînin. Bendewariyên wî jî hene. Ew jî ji bo ku cihê xwe di nava AKP’ê de bi hêz bike li dijî me daxuyaniyan dide û dixebite. Mesele hemû ev e. Beşeke malbata Şêx Saîd li Erzirom, beşek li Elezîz û beşek jî li Amedê dijî. Em hemû li Amedê hatin cem hev û me îlan kir ku em tevlî BDP’ê bûne. Kurê Şêx Saîd, Şêx Ahmet di serî de em hemû piştgiriyê didin BDP’ê. Ji bilî Abdurahîm Firat. Ew jî ji bo berjewendiyên xwe yên şexsî wisa dike.”