ÊLIH

Di pîrozbahiya Newrozê ya li Êlihê de, Hevserokê Giştî yê BDP'ê Selahattîn Demîrtaş ji bo sed hezar beşdarên pîrozbahiyê axivî.

Demîrtaş bi çepik û tililiyan derket ser dikê, destpêkê ji bo Şaredarê Êlihê yê girtî Nejdet Atalay silav şand. Demîrtaş got, "Ji vê derê em ji bo Şaredarê Êlihê yê dîlgirtî Nejdet Atalay silavên xwe dişînin û Newroza wî pîroz dikin. Bi zehmetiyên salên dirêj û têkoşîna ji berdêlên giran re we vîneke gel afirandin. Hewceyî pê nîn e ji bo gelê Êlihê em behsa zor û zehmetiyên têkoşînê bikin. We ev têkoşîn meşand. Her partiyên tevlî hilbijartinan dibin xwedî sozan e, lê belê ya ku di kesayetiya BDP'ê de berçav bûye, daxwaza azadiyê ye."

Demîrtaş diyar kir ku her dengê ji bo AKP'ê bê dayîn tê wateya erêkirina lêdana dayik û zarokan li nava kolanan û got, "AKP dikare rê jî çêbike, nelirêtiyê jî bike. Di warê dirûtiyê de kes ji wan jêhatî nîn e. Ez yên li vê qadê posterên Serok Apo vekirine silav dikim, dê ji niha û pê ve kes nikaribe vê yekê ji nedîtî ve were. Her dengekî ji bo BDP'ê bê dayîn tê wateya jibîrnekirina lêdana dayik û zarokan li nava kolanên Êlihê bi ço û bombeyên gazê. Tê wateya jibîrnekirina Roboskî. Tê wateya jibîrnekirina deh hezaran girtiyên li girtîgehan."

Demîrtaş got, "Em ji bo avakirina bajarekî nû xebitîn. Me keskê dolar nedît, pereyên di qutiyên pêlavan de nedît, lê me bajarekî nû ava kir. Me vîna gel esas girt, me xiyanet li nirxên gel nekirin, pêşkêşî rantxuran nekirin." 

Hevserokê BDP'ê Demîrtaş destnîşan kir ku ewê rê nedin AKP'ê ku dizîtiyê bike û got, "Li vê derê cih ji dizîtiyê re nîn e, rêveberiya gel a zelal dê li vir hebe. Gelê Êlihê wê her pariyê heram ê we xwariye, di bêvila we de bîne."

Demîrtaş ji gelê Êlihê xwest ku li dora rêveberiya Şaredariyê bibe yek û wiha peyivî:

"Dema hevalên me Sabrî û Gulistan di 30'ê Adarê de wezîfe dewir girt, wê derî vekirî bin, telefonên wan vekirî bin. Dê bi tenê xizmetê bide we, hurmetê nîşanî vîna gel bide û şaredarvaniyeke paqij bimeşînin. Tirkiye wê di 30'ê Adarê de matmayî bimîne. Ji Erdexanê heta Rihayê meşaleya BDP'ê wê pêketî be. Em ji gelê Êlihê rica dikin ku bê rawestan bixebite."

ÊLIH WÊ TE BIKE MIROVÊ CÛCE

Demîrtaş da xuyakirin ku Serokwezîrê Tirkiyeyê Recep Tayyîp Erdogan li her bajarî bi protestoyan tê pêşwazîkirin û bibîr xist ku Erdogan, Berkîn Elvan "terorîst" îlan kiriye. Demîrtaş got, "Ji bo qirêjiya wî, zilma wî were dîtin pêwistî bi kasetan nîn e. Em li van qadan, em neketin pê cemaetê. Em bi gelê xwe re bûn partiyeke mezin. Ji bo her kesî qala dirûtiya van bikin. Tiştekî van nemaye bidin Tirkiyeyê. Serokwezîr li her bajarê diçê tê protestokirin, 50-100 kes tên girtin, lê 50 kesên li hev dicivin diçin êrîşî avahiyên HDP'ê dikin. Tu karê emniyetê nameye, Serokwezîr ji gel û kasetan diparêze. Êlih wê di 30'ê Adarê de te bike mirovê cûce. Ji Serokwezîrekî  wicdanê xwe winda kiriye, gelo di mijara demokrasî û azadiyê de em dikarin li benda çi bin? Ceylan Onkol, Berkîn Elvan wekî terorîst îlan kir. Li her devera Tirkiyeyê, mîna ku kevir diavêje şeytên, zarok keviran diavêje te. Zarok êdî bi şekir û pêlîstokan nalîzin, bi gef û axaftinên te yên provokatîf civak hatiye nuqteya teqînê. Êlih wê ji wan zarokên ku te ew terorîst îlan kir re, di 30'ê Adarê de silavê bişîne."

Piştî axaftina Demîrtaş hunermend Servet Kocakaya, dûre hozan Diyar û paşê jî Dilovan derket ser dikê û stranên xwe pêşkêş kir.

Foto: Ferhat Aslan