ENQERE
Heyeta Desteya Bilind ya Kurd (DBK) ku wekî vîna siyasî ya Rojava tê pejirandin, li Enqereyê bi Balyozên YE'yê re hevdîtin pêkanî. Heyetê xwestiye bi Wezareta Karên Derve ya Tirkiyeyê re jî hevdîtinê bike lê heta niha bersiv nehatiye dayîn.
Şandeya ku ji endamên Desteya Bilind ya Kurd û Meclisa Gelê Kurd ya li Sûriyeyê pêk tê ji bo hinek hevdîtinên dîplomatîk hatine Enqereyê, dest bi hevdîtinên xwe kirin.
Hevdîtinên şandeyê bi Nûnertiya Yeketiya Ewropa ya li Tirkiyeyê, rayedarên Balyozxaneya Amerîka, Balyozxaneya Almanya, nûnerên rêxistinên civakê yên sivîl û partiyên siyasî didomin. Hevdîtin dê sibe jî dom bikin.
Endama Desteya Bilind ya Kurd Îlham Ehmed ji bo DÎHA’yê axivî û got ku, ew bi nûnerên Yekîtiya Ewropayê re li ser nêzîkatiyên Ewropayê li hember Sûriyeyê û dê civîna li Cenewreyê pêk bê dê çawa be axivîne.
Îlham Ehmed diyar kir ku wan ji balyozan re gotiye ew dixwazin bi awayekî serbixwe beşdarî Civîna Cenewreyê bibin û got, rayedarên Yekîtiya Ewropayê jî behsa girîngiya serîlêdana serbixwe ya kurdan kiriye û destnîşan kiriye ku ew li Sûriyeyê muxalefetekî rast dimeşînin.
Îlham diyar kir ku, wan li ser têkoşîna kurdan ya li Rojava jî agahî dane, ambargo jî anîne rojevê û xwestine deriyên sinor bêne vekirin. Îlham wisa got: “Pêwîst e Tirkiye siyaseta li hemberî kurdan biguherîne. Pêwîst e hebûna kurdan qebûl bike. Ev ne şermek e, qezencek e. Pêwîst e pelek nû vebe. Em dixwazin bi kurdan re pêvajoyekî nû bidin destpêkirin. Di hevdîtinan de me ev daxwaz kirin. Me xwest di vê mijarê de zextê li Tirkiyeyê bikin.”
Li ser hevdîtina bi Wezareta Karên Derve ya Tirkiyeyê re jî Ehmed wisa got: “Em dixwazin hevdîtinekê bikin. Me daxwaza xwe ragihand. Eger bixwazin hevdîtinê bi me re bikin ya nekin ew dê biryar bidin. Li şûna bi rêya balyozxaneyan, ji xwe em jî dixwazin daxwazên xwe raste rast ji bo hikumetê ragihînin. Eger em hevdîtinê nekin jî ew biryara wan e. Heya niha bersivek fermî nedane me.”
Îlham Ehmed di derbarê dîwarê di navbera Nisêbîn û Qamişlo de tê avakirin jî ev tişt anî ziman: “Êdî ew dîwar nabin çare. Ji ber ku kurdan di feresata xwe de, fikir û ramanên xwe de dîwar rakirine. Ji ber vê neçare ye. Ya girîng ew e Tirkiye siyaseta xwe biguherîne. Ji vê zêdetir tu çareyên din nîn in.”
Endamê DBK'ê Mihemedê Mûsa jî diyar kir ku, sedema bingehîn ya serdanê daxwazên wan ên siyasî û vegotina mîsyona vîna kurd a li Sûriyeyê ye. Mûsa got ku, li Rojhilata Navîn bêyî kurdan çareserî nabe û wisa dom kir: “Li herêmê bêyî kurdan aramî çênabe. Çareseriyekî ku hev qebûl bikin pêwîst e. Pêwîst e hemû gel li gel hev bijî.î
Heyet sibê dê here Navenda Giştî ya BDP'ê û daxuyaniyeke bide çapemeniyê.