AMÛDÊ
Li ser banga Hevgirtina Eşîrên Kurd li Herêma Cezîrê, di navbera nûnerên hevgirtinê, Yekîneyên Parastina Gel (YPG) û Yekîneyên Parastina Jinê (YPJ) bi beşdariya nûnerên Komîteya Pispor ya Desteya  Bilind a Kurd, li bajarê Amûdê civînek hate lidar xistin.

Li bajarê Amûdê ku berî çend rojan tabûra Şehîd Serhed a YPG'ê rastî êrîşeke çekdarî hatibû û di encamê de endamê YPG'ê Îsa Gulo jiyana xwe jidest da. Ji bo nirxandina rewşa bajarê Amûdê û çereserkirina aloziyan, Hevgirtina Eşîrên Kurd li Herêma Cezîrê banga civînê kir. Li ser vê bangê di navbera nûnerên hevgirtinê, Yekîneyên Parastina Gel (YPG) û Yekîneyên Parastina Jinê (YPJ) bi beşdariya nûnerên Komîteya pispor ya Desteya  Bilind a Kurd, li bajarê Amûdê civînek hate lidar xistin.

Endamê Fermandariya YPG'ê Cemşîd  di civînê de bûyer ji beşdaran re vegot, Cemşîd diyar kir ku êrîşa li dijî  Yekîneyên wan ji hêla Koma bi navê Tabûra 313’an ve hatiye plankirin, di dema êrîşê de tenê endamên hevrêzan û yên partiyên siyasî li meydanê xuya kirin, ev tê wê wateyê ku ew bi xwe endamê tabûra 313'an bûn û di destên wan de gelek çekên şer hebûn, eger ew ji bo xwepêşandanê derketibûn çi pêdiviya wan bi çekan hebû.

Cemşîd, diyar kir ku YPG hêzeke netewî  ya parastinê ye, ne ya birakujiyê ye û wiha dawam kir: "Bûyer li gor hesabên hin hêzên derve, di serî  de yê dewleta Tirk hatibû plankirin, ji xwe ambulansên Tirkan ji bo veguhestina birîndaran li ber sînor hatibûn amadekirin."

Fermandariya YPG`ê pêşniyarên Hevgirtina Eşîran yên di derbarê çareseriya aloziyê û cezakirina sûcdaran de pejirandin.

Bi navê Hevgirtina Eşîran Ebdilqadir Ebdilezîz jî biryarnameya civîna Hevgirtina Eşîran ku berî rojekê li bajarê Qamişlo hatibû lidar xistin ji beşdarên civînê re eşkera kirin, di biryarnameyê de ev biryar hatine destnîşan kirin:

1- Di derbarê bûyerê de ji hemû Eşîran komîteyek lêkolînê were avakirin.

2- Bi hemû aliyan re diyalog were destpêkirin.

3- Bi hêzên siyasî, çandî û civakî re hevdîtin werin lidar xistin.

4- Hemû girtiyên ku lêpirsîna wan bi dawî bûye û destên wan di bûyeran  de tune ye bêne berdan.

Fermandariya YPG'ê ku ev biryar bi erênî  nirxandin , ji Hevgirtina Eşîran xwest ku ji gunehkarên ev kiryar birêve birine hesab bixwazin.

Di dawiya civînê de biryar hate girtin hemû girtiyên ku lêpirsîna wan bidawî bûye û destên wan di bûyeran  de tune ye bêne berdan û radestî  komîteyên Hevgirtina Eşîran bêne kirin.

Tê payin ku Hevgirtina Eşîrên Kurd  li Herêma Cizîrê hevdîtinên xwe bi alî û rêxistinên Kurd yên bajêr re berdewam bike.

Ji ANHA'yê hatiye girtin