Diyarname

Biryar hat girtin: Yên ku li kanala televîzyonê ya muxalefetê temaşe bikin dê bêne girtin. Dikare hema li welatek jî ev yek çêbibe lê niha meseleya me Belarus e.

Li Belarusê kanaleke bi navê "Belsat" heye ku kanala muxalefetê ye. Navenda kanalê li Varşovaya Polonyayê ye û ji ser peykê re li wir weşanê dike. Rêveberiya Belarusê ev kanal wekî "Rêxistina radîkal" bi nav kir û li gor zagonên welat "yên ku li vê kanalê bixebitin û yên ku vê kanalê temaşe bikin dê bi 7 sal cezayê hepsê bêne cezakirin".

Belsat cih dide agahiyên muxalefetê lê dewlet dijî vê yekê ye. Îsal di meha reşemiyê de du rojnamegerên çalakî dikişandin hatin tewqîfkirin.

Piştî dewletê ev biryara qedexeyê girt, hat gotin ku Wezareta Karên Hundir bi ser peykê yan jî bi ser înternetê re temaşekirina vê kanalê qedexe kiriye.

Li aliyê din rêveberiya Belsatê li hemberî vê yekê got ku ev biryar biryareke beredayî û vala ye. Franak Viacorka ku şêwirmendê rêbera muxalefetê Sviatlana Tsikhanouskaya ye bi ser twittirê re wisa nivîsî: "Li dinyayê yekemîn car rejimek temamê kanalê qedexe dike. Ev yek bandorê li 940 hezar kesî dike. Li aliyeke tehdîd dikin, li aliyê din jî ev biryar serketina kanalê nîşan dide."

Belarus ku der e?

Belarus welatekî Ewropayê ye. Polonday, Ukrayna, Lîtvanya û Rusya cîranên wê ne. Bajarê wê yê mezin Minsk e. Zimanê fermî belarûsî û rusî ye. Sedî 81 belarusî, sedî 11,4 rusî, sedî 2,4 ûkraynayî li wir dijîn û ligel wan hin kêmareyên din jî.

Berasul di sala 1990'î de ji Yekîtiya Sovyeta Berê veqetiya 3u bû serbixwe. Serokdewletê Aleksandr Lukaşenko di sala 1994'an de hat ser kar û hê jî li ser kar e. Di sala 2006'an de Yekîtiya Ewropayê ligel wî çûyîna 31 rêveberên wî ji bo nav sînorên Yekîtiya Ewropayê qedexe kir. Li Belarusê anket, dîtin û axaftinên alîgirên muxalefetê qedexe ne.