Diyarname
Hejmara nû ya kovara Zendê derket. Kovarê di vê hejmarê de meseleya "Di zargotina kurdî de hesp" derxistiye pêş.

Kovara lêkolînî Zend ku ji aliyê Enstîtuya Kurdî ya Stenbolê ve tê derxistin, hejmara xwe ya nû ya bihara 2013'yan hinek derengî be jî gihand ber destê xwendevanên xwe. Zend wekî kovareke akademîk cih dide nivîsên der barê ziman, wêje û dîroka kurdî, di vê hejmarê de jî gelek nivîsên girîng û balkêş hene.
Yek ji wan jî "Di zagortina kurdî de hesp" e ku Şemoyê Memê nivîsandiye.
Di warê nivîsên ziman de Î. Seydo Aydogan mijara rêzimana kurdî, mijara “medyatîf”ê hildaye dest; Zana Farqînî mijara guherîna dengan hildaye dest û li gorî diyardeyên denganiyê yên zimanzaniyê ew senifandine.
Umîd Demîrhan û Abdullah Haciyan der barê kurmanciya Xoresanê de nivîsek amade kiriye.
Azad Makûyî jî mijara “ku” hildaye dest. Her wiha Dilawer Zeraq bi nivîsa “Rêbera Rastnivîsîna Kurmancî” di beşa ziman a kovarê de cih girtiye.

Her wiha Memê Mala Hine, di vê hejmarê de nivîsek der barê wêjekar û ronakbîrê navdar Piremêrd de amade kiriye û weşandiye; Şerîf Derînce jî dest avêtiya mijara perwerdehî û zayendê.

Di der barê kovarên berê yên kurdî de sê nivîs di vê hejmara Zendê de cih girtine; Ronayî Onen û Samî Tan der barê Rojî Kurd de, Murad Celalî jî der barê Kovara Tîrêj de nivîs amade kirine.
Her wiha di vê hejmarê de bi zaravayê kirmanckî jî nivîsek heye. Wisif Zozanî der barê xebatên Albert von Le Coq de nivîsek amade kiriye. Seyidxan Kurij jî der barê lêkolînên Peter Lerch de gotarek nivîsandiye.

Di vê hejmarê de tekane nivîsa der barê dîrokê de nivîsa Îkram Îşler e. Ew jî xebateke dîroka devkî ye. Îşler di hejmara Zendê jî bi şahidê qirkirina Geliyê Zîlan re hevpeyvînek pêk aniye.