Diyarname

Di sala 2017’an de berî pîrozbahiya Newroza Amedê Kemal Kurkut ji aliyê polîsan ve hat tazîkirin û paşê polîsek gule bera wî da û ew kuşt. Rojnameger Abdurrahman Gok wêneyê van kêliyan kişandibûn. Li ser vê yekê 5’emîn Dadgeha Cezayê Giran a Amedê bi îdîaya “Endamtiya rêxistinê” û “Propagandaya rêxistinê kiriye” doz li rojnameger Gok vekiribû. 30’ê pûşpera 2022’yan de biryar hat dayîn. Gok ji “endamtiya rêxistinê” beraat kir lê dadgehê bi îdîaya “propagandaya rêxistinê kiriye” salek, 6 meh û 22 roj cezayê hepsê lê birî.

Dadgeha Îstînafê ev cezaya ku li Gok hatiye birîn erê kir. Dadgehê got, “Di biryarê de şaşî nîn e” û ceza erê kir.

Parêzerê Gok, parêzer Resul Temur got ku ev cezaya hatiye dayîn ne hiqûqî ye, dadgeh ne li gor hiqûqê tevgeriya ye, ligel vê yekê xalên zagonên jî neanîne cih. Temur diyor kir ku ji bo betalkirinê dê serî li “temyîz”ê bidin.