Diyarname
Şaredariya Bajarê Mezin a Amedê, Şaredariya Baglar, Yenîşehîr, Kayapinar û Sûra Amedê ji bo Rojava kampanyaya berhevkirina xurekê da dest pê kirin. Şaredar Baydemîr got: "Roj, roja parvekirina nanê me ye."

Ji bo eşkerekirina kampanyayê li ber Şaredariya Bajarê Mezin a Amedê bi beşdariya Şaredarê Bajarê Mezin ê Amedê Osman Baydemîr, Şaredarê Yenîşehîrê Selim Kurbanoglu, Şaredarê Sûrê Abdullah Demirbaş, Şaredara Baglarê Yuksel Baran, Cîgirê Şaredarê Kayapinarê Îhsan Avci, endamên meclisên  şaredariyan, endamên saziyên sivîl, Odeyên Pîşeyê, endamên Dayikên Aştiyê û hin Seydayên kurd civîneke çapemeniyê hate li dar xistin.

Şaredar Baydemîr li ser navê Şaredariya Mezin û 4 şaredariyên navçeyên navendî yên Amedê axivî. Baydemîr got ku ew hêvî dike ku di kurtedemê de gelên Sûriyê bigihîjin aştî, azadî û demokrasiyê û wiha dom kir: "Li wê demê rewşeke dijwar ku gel têde dijî heye. Ambargoyeke ku dike feqîrî, birçîbûn çê bibin heye... Di rewşeke wisa de gelê me yê Amedê di nav piştgiriyekê de ye. Ez sipasiya wan dikim."

Baydemîr got ku heta niha digel alîkariyên ku hatine şandin, niha şaredariyên me piştgiriya xwe didomînin û kampanyayeke ku dê mehekê bidome didin dest pê kirin. Tiştên ku di vê kampanyayê de bêne berhevkirin dê ji ser Nisêbînê re bişînin Heleb, Efrîn, Qamişlo û Serêkaniyê.

Şaredarê Bajarê Mezin Baydemîr ku pêdivî bi deh tiştan heye û ev tişt wisa rêz kir: Xurek, arvan, birinc, rûn, çay, şekir, kincên pê bin zarokan girê didin û şîrê ji bo zarokan. Şaredar Baydemîr got ku ji bilî van tiştan dê alîkarî neyê qebûlkirin.

Kesên bixwazin alîkarî bişînin dikarin bişînin Sumerparka ku Daîreya Xizmetên Civakî ya Şaredariya Bajarê Mezin lê ye; Midûriyeta Zabiteyan a Şaredariya Baglarê; Şartiyeya Şaredariya Kayapinarê; Şantiyeya Deriyê Mêrdinê ya Şaredariya Sûrê; Şantiyeya Alîpinar a Şaredariya Yenîşehîrê.

Şaredar Baydemîr ji gelê Amedê rica kir ku di kurtedemê de alîkariyê bide hev û got: "Roj, roja parvekirina nanê me ye. Roj, roja piştgirî û hevkariyê ye. Roj ew roj e ku em dilê xwe bigihînin dilê birayên xwe."