Amed
Îro bi sed hezaran li Amedê ji bo Newroza 2026'an hatin ba hev. Newrozek serketî li dar ket. Siyasetmedar Leyla Zana axivî. Peyamana rêberê PKK'ê Abdullah Ocalan hat xwendin. Hevserokê DEM Partî Tuncer Bakirhan axivî. Stran hatin gotin, govend hatin gerandin.

Va ne çend notên ji Newroza Amedê:

Hevserokê DEM Partî Tuncer Bakirhan: Kurd demokrasiya herêmî dixwazin
- Li ber şahidiya mîlyonan ezê daxwazên we yên dîrokî bînim ziman. Dipirsin kurd çi dixwazin? Îro di Newroza 2026'an de li Qada Amedê em carek din diyar bikin ku kurd çi dixwazin. Kurd dixwazin li Tirkiyeyê nasnameyê wan bê nasîn. Kurd bi zimanê zikmakî perwerdehiyê dixwazin. Kurd di Zagona Bingehîn de ewlehiyê dixwazin. Kurd demokrasiya herêmî dixwazin. Kurd hemwaletiyeke wekhev dixwazin.
- Dema ev Komar hat avakirin li eniyê kurd hebûn. Li Çanakkaleyê, li Rihayê, di Şerê Rizgariyê de, li çar aliyên Tirkiyeyê kurd hebûn. Dema Meclis hat avakirin li Meclisê kurd hebûn. Ev welat bi hev re hat avakirin. Berdêl hat dayîn. Di felaket û êşê de bi hev re bûn. Wê çaxê di dema seadetê de em çima ne şirîk bin. Em naxwazin giraniya vê pirsgirêkê bihêlin ji bo nefşên bê. Em dixwazin vê qederê biguherînin.
- Ev çîroka di avakirina Komarê de nîvco ma ye, bi encama ku her kes jê kêfxweş bibe em dixwazin temam bikin.  Daxwaza kurdan ne cudabûn, şirîkatî ye.
- Kurd ne înkarê, naskirinê dixwazin. Ev ne diyarî ye, mafek e. Kurd dixwazin bibin şirîkê rêveberiyê.

Siyasetmedar Leyla Zana: We bereket anî
- Amed, we bi sekna xwe bereket anî. Newroz pîroz be. Ji vir gelek peyam hatin dayîn. We ji bo Rojava jî sekneke xurt nîşan da. Gelê Kurd bi sekna xwe peyama xwe da siyasetmedaran, em yek in, Kurd in û wekî gelên din xwedî maf in. We peywîra xwe bi cih anî. Divê siyaseta Kurd jî erka xwe pêk bîne.
- Ez dixwazim ji hikumetê re jî çend gotinan bejim, salek û nîv e hûn daxwaza vî gelî pêk naînin. Gel dixwaze Serok li Amedê bibîne. Ji ber ku dixwazin pêşerojê bi hev re ava bikin. Di kesayeta Rêber Apo de Newroza hemû girtiyan pîroz dikim. Di nav xêr û xweşiyê de bimînin. We sekneke xurt diyar kir. Cîhan hemû we temaşe dike. Di nava xweşiyê de bimînin, azad bijîn û her tim li ser pêyan bin.”

Rêberê PKK'ê Abdullah Ocalan:
- Sembol û kesayetiyên Newrozê giyanê vê herêmê nîşan didin. Dehaq temsîla pergala şaristaniya dewletan e; marên li ser milên wî ku her roj mejiyê du ciwanan dixwin hovîtiya dewleta Asûrî temsîl dikin, Kawayê Hesinkar remza berxwedanê ya li dijî zilmê ye. 
- Şerên olî, mezhebî û çandî yên ku hezar sal in li Rojhilata Navîn berdewam in, derbeya herî mezin e li çanda jiyana hevbeş a di navbera gelan de. Her ku her nasname û her bawerî hewl dide vekişe hundirê qalikê xwe û yê din bike dijmin û bi vî awayî hebûna xwe bidomîne, dûrketina di navbera gelên me de kûrtir dibe. Nirxên me yên hevpar û çanda me ya hevpar tên paşguhkirin, cudahiyên me wekî sedema şer tên dîtin.
- Divê em bawer bikin ku çand û bawerî dikarin bi hev re bijîn, em dikarin ji îdeolojiyên teng ên neteweperest derbas bibin û li ser bingeha entegrasyona demokratîk bibin yek û bi hev re hebûna xwe ava bikin. Divê em wê hişmendiyê derxin holê ku em dikarin wekî di dîroka me de çêbûye îro jî li hember her cûre şer, xizanî û hovîtiyê bi ser bikevin.
Em rê nedin ku Rojhilata Navîn ku çandê diafirîne, ji aliyê hêzên hegemonîk ve bibe qada şer. Wekî di dîrokê de çêbû, em dikarin îro jî bi hev re astengiyên li pêşiya vê çanda mezin ku bikare xwe bi awayekî azad îfade bike û li ser bingeha nasnameyên xwe yên rastîn entegre bibe, derbas bikin. Dema ku em nexweşiyên neteweperestî û mezhebî li dû xwe bihêlin û çanda dîrokî ya hevgirtinê ya hezar salan di navbera gelên xwe de xurt bikin, tu astengiyek namîne ku em nikaribin derbas bikin.
- Mimkun e ku mirov bi ruhê yekîtiyê siyaseta demokratîk diyarî bike. Eger em bixwazin têkoşîna hezar salan a bindestan tacîdar bikin, cihê vê yekê li Rojhilat jî li Rojava jî ne di hawîrdora çandî ya kapîtalîst de ye, cihê wê hawîrdora azad a Rojhilata Navîn e. Em dikarin entegrasyona demokratîk li van axan li ser bingeha hevdîtineke rasteqîne û mirovahî, yekîtî, hevgirtin û dostaniyeke nû nûjen bikin.

- Koma Ribabê, Dîlan û Erkan Top, Elend Hazim, Koma Agirê Jiyan û Zinar Sozdar derketin ser dikê

- Di dawiya bernameyê de pêşkêşvanan sloganên, “Rojava Rojhilat e Kurdistan yek welat e” û “Yek e yek e yek e Kurdistan yek e” berz kirin û girseyê jî bi yek dengî slogan dubare kir.