Diyarname
Polîsên Fransayê bêyî sedemeke nîşan bidin Endamê Konseya Rêveber a KNK'ê Adem Uzun girtin. KNK'ê daxuyaniyeke nivîskî weşand û xwest Uzun cih de bê berdan.

Kongreya Neteweyî ya Kurdistanê (KNK) di daxuyaniya ku ji bo Adem Uzun weşand de wisa got: "Adem Uzun wekî endamê Konseya Rêvebir ji ber karûbarên dîplomatîk û amadekariya Konferansa 13'ê mehê [13 Çirîya Pêşîn-October-2012] ya li ser rojavaya Kurdistanê çûbû Parisê ku konferans dê li saloneke Parlementa Fransayê li Parîsê çêbe. Dewleta Tirk di her keysî da daxwazê ji dewletên Yekîtiya Ewropayê dike ku xebata polîtîkerên kurd asteng bikin. Herî dawiyê Serokwezîr Erdogan Almanya û Fransa bi nav kirin û got ku ev dewlet hevkariya Tirkîyeyê nakin ku xebata kurdan li saheya Ewropayê bloke bikin. Fransayê bi girtina Adem Uzun adeta dîrektîfa Erdoganî înaye cih ku ev dê zerarê bigihîne sîstemê demokratîk yê Fransayê. Dozgerê ku Adem Uzun daye girtin Thierry Fragnoli meşhûr e bi girtina polîtîkerên kurd û piştî girtina Adem Uzun jî got ku ew tênagihin bo çi Tirkiye ji wan nerazî ye. Dozgerî bi zelalî got ku gotinên Erdoganî yên ku goya Fransa hevkariya wan nake ne rast in û wan bi girtina polîtîkerê kurd Adem Uzun nîşan daye ku ew hevkarê dewleta Tirkîyeyê ne. Ev axaftina bêtalih ya dozgerê Fransî Thierry Fragnoli nîşan dide ku wan bi hevkariya dewleta Tirk ev operasyon li ser polîtîkerê kurd Adem Uzun pêkînane ku ev ji aliyê kurd û kurdistaniyan ve qetiyen nayê qebûl kirin."

Di daxuyaniyê de hate gotin ku kurd li gorî qanûnên dewletên YE'yê xebatên xwe dikin. Dewletên YE'yê divê li gorî daxwazên dewleta Tirk hereket nekin û jiyanê li kurdên cografyaya xwe teng nekin. Daxuyanî wisa dom kir: "Dewleta Tirk dixwaze sîstemê xwe yê antî demokratîk ixracî nav YE'yê jî bike û mixabin hindek dewletên YE'yê jî bi girtina polîtîkerên kurd dibine şirîkê antî demokratîzma dewleta Tirkiyeyê. Dewletên YE'yê û bi taybetî jî Fransa vê pratîka krîmînîzasyonîst ya li ser polîtîkerên kurd divê behemehal terk bikin."

KNK girtina Adem Uzun wekî êrîşkarîyeke beramberî xelkê kurd bi nav kir û wisa got: "KNK li hêviyê ye ku dewleta Fransayê zûtirîn demê de Adem Uzun serbest bike û lêborîna xwe ji Adem Uzun, KNK'ê û xelkê kurd bixwaze. KNK li hêviyê ye ku kurd û kurdistanî û her wiha dostên xelkê kurd yên li Fransa û her derê dinyayê vê êrîşkarîya dewleta Fransayê mehkûm bikin û fişarê bibine ser hikumeta Fransayê ku Adem Uzun serbest bikin."