Vîdeoyek:
___Cemil Oguz___
42'yemîn Fûara Pirtûkan a Stenbolê bi merasimek dest pê kir. Di merasimê de Mêvanê Rûmetê Murathan Mungan rexneyên tûj li Wezarata Perwerdehiya Tirkiyeyê û rewşa 30 salên dawî kir. Serokê TYB'ê Kenan Kocatürk jî bang li Wezareta Çandê kir ku di warê pirtûkxaneyan de gavan biavêje.
3000 NIVÎSKAR WÊ PIRTÛKÊN XWE ÎMZE BIKIN
Fûara Pirtûkan a Stenbolê ku ji aliyê TUYAP'ê ve tê organîzekirin îro dest pê kir û heta 21'ê mehê didome. Li ser navê Tuyapê Îlhan Ersozlu axivî, diyar kir ku diruşma îsal a fûarê ew e ku her aliyê wêjeyê ya dest dide mirovan tîne ziman. Ersozlu got ku li gor hejmara dawî dor 500 çalakiyên çandî li fûarê hene û dor 3 hezar nivîskar li fûarê wê pirtûkên xwe îmze bikin.
'LI VIR GELEK FIKRÊN CUDA LIGEL HEV IN'
Serokê TYB'ê (Yekîtiya Weşangerên Tirkiyeyê) Kenan Kocaturk li ser fûara pêşî ku di sala 1982'yan de li Taksîmê hatibû çêkirin û heta niha kir û got, "Wê çaxê çek û pirtûk li televîzyonan li ber hev datanîn, weşangeran nediwêrî pirtûkan çap bikin. Wê demê Bulent Înal û hevalên wî ev da dest pê kirin. Ji ber pirtûkên wan pirtûkxaxneyan nediwêrin belav bikin, Rifat Ilgaz û Azîz Nesîn pirtûkên xwe anîn û li vir îmze kirin. Ligel hemû qedexeyê heta îro em hatin. Niha li vir hemû fikir û dîtinên cuda ligel hev in. Ji ber vê yekê em dibêjin şahiya çandê."
Kocaturk li ser îstatîstika pirtûkan jî diyar kir ku li gor ISBN'yê par 92 hezar û 595 pirtûk çap bûne, li gor îstatîstika 11'ê vê mehê heta niha 92 hezar heb in. Ji van 19 hezar û 49 heb e-pirtûk, 888 heb pirtûkên bi deng in ên online in.
Kocaturk li ser rewşa pirtûkxaneyan jî sekirî û got, "Butçeya ji bo pirtûkxaneyan hatiye veqetandin gelek hindik e. Gere wezaret vê pêş bixe. Rêveberiyên herêmî jî gere di vî warî de gavan biavêjin. Di belavkirina pirtûkxaneyan de pirsgirêk heye. Em di warê 'dema dixwînin çiqas fêm dikin' de gelek li paş in. Li nav 72 welatan em di rêza 40'î de ne. Hêza xeyalkirinê bi xwendinê dibe."
Her wiha Kocaturk li ser pirtûkxaneyên MEB'ê (Wezaneta Perwerdehiya Tirkiyeyê) jî sekinî û got ku divê MEB ligel weşanxaneyan reqabetê neke. Divê piştgirî bike. Pirtûkxane gere zêde bibin. Pirtûkfiroşên heyî jî ne ku bêne girtin, ji bo li ser lingan bimînin divê wezaret rêyek bibine.
MUNGAN: EZ JI NIFŞÊ DEMA KURDÎ DINIVÎSANDIN DIHAT QEDEXEKIRIN TÊM
Mêvanê Rûmetê yê Fûarê yê îsal Murathan Mungan bi sipasiya xwendevanên xwe ku xwedî li pirtûkên wî derketine, sipasiya kesên helbestên wî ji ber kirine, li lîstikên wî temaşe kirine, sipasiya weşangerên xwe kir û paşê got, "Dema em ji kevneşopiya wêjeya me dinerin, ji Nazim Hîkmet heta Ahmed Arif, ji Sabahattin Ali heta Azîz Nesin, heta rojnameger û rewşenbîrê wê li girtîgehê, ez ji kevneşopiya jiyana wan bi têkoşîna dijî sansurê û qedexeyan çûye têm; ji kevneşopiya dema kesek bi kurdî tiştek dibêje, dinivîse, diweşine tê qedexekirin têm, ez wekî nivîskarek ku ji Nişê 78'an têm, TUYAP'ê nivîskarekî wisa bi rûmet kiriye. Bi vê ez vê yekê fêm dikim; TUYAP'ê bi vê yekê keda mirovên li paşerojê mane birûmet kiriye."
MUNGAN: TIRKIYEYÊ ZIMANÊ XWE, WIJDANA XWE WINDA KIR
Mungan bêyî nav bide rexneyên tûj li serdema dawî ya Tirkiyeyê kir û got, "Tirkiyeyê di 30 salên dawî de zimanê xwe winda kir. Ev yek ne tenê di warê nivîsandin û xwendinê, di warê dema xwendinê de fêmkirinê, li welatê ku bi 300 peyvî roja îdareya xwe dike, di rewşek wisa de kesên bi 30 hezar peyvî dinivîsin karen wan hê zehmetir dibe. Sedema windabûna ziman mirov bi encamên li dinyayê ve girê bide bi ya min têre nake. Tirkiye di 30 salên dawî de zimanê xwe, ehlaqê xwe, wijdanê xwe, nirxên xwe yên bingehîn winda kirin. Em 30 salên herî tarî yên serdema Komarê dijîn û em bi wezîrê çandê yê herî xirab yê Tirkiyeyê re rû bi rû ne."
Di merasima destpêkirina fûarê de Midûrê Giştî yê Pirtûkxaneyên Tirkiyeyê Taner Beyoglu, şêwirmendê fûarê nivîskar Dogan Hizlan jî axivîn. Her wiha Wekîlê Şaredarê Stenbolê Nuri Aslan jî axivî. Aslan silavên Şaredarê Stenbolê yê girtî Ekrem Îmamoglu ragihandin û got, "Berî sala 2019'an li Stenbolê 20 pirtûkxane hebûn, Îmamoglu ev derxistin ser 70'yî, niha 73 pirtûkxaneyên me hene. Ekrem îmamoglu mirovekî çandê ye. Li Beylikduze ev meseleya pirtûkxaneyan da dest pê kirin û li Stenbolê belav kir. Emê Stenbolê bikin paytexta pirtûkan."
***
Nûçeya Eleqedar:
- Weşanxaneyên kurdan beşdarî Fûara Stenbolê dibin
- Mêvanê Rûmetê Murathan Mungan e
*************
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.
***************