DiyarName.Com

Li Balyozxaneya Îsraîlê ya Berlînê bi resepsiyonek Newroz hat pîrozkirin

Dîrok: 20/03/2025

Diyarname
Îşev Balyozxaneya Îsraîlê ya paytexta Almanya Berlînê û Civaka Kurd li Almanya (KGD) di qesra Balyozxaneya Îsraîlê de bi hev re cejna Newrozê pîroz kirin.

Mêvandar û Balyoz Ron Prosor di axaftina xwe de girîngiya pêwendiyên nêzîk di navbera her du gelan de anî ziman û behsa hevpariyên wan ên ku di nav sedsalan de hatine xurtkirin kir.

'HER DU GEL JI BO MAFÊ HEBÛNA XWE TÊDIKOŞIN'
Serokê Civaka Kurdên li Almanyayê Ali Ertan Toprak jî di axaftina xwe de bîra mêvanan anî ku zêdetirî 300 hezar kurd li Îsraîlê pira zindî ya di navbera her du neteweyan de pêk tînin û her du gel jî her roj ji bo mafê hebûna xwe têdikoşin.

'ÇALAKIYÊN SAZIYÊN SIVÎL BO KURDAN Û CIHÛYAN GIRÎNG IN'
Serokwezîr eyaleta Sachsen Anhaltê Reiner Haseloff bi navê serokê Partiya Filehên Demokrat (CDU) û serokwezîrê hikumeta Almanyayê ya di rojên pêş de were ragihandin Friedrich Merz ji bo mêvanan axivî û cejna Newrozê li wan pîroz kir. Wî teqez kir ku çalakiyên civaka sivîl li dijî dijminatiya cihûyan û kurdan çiqas girîng in.

GELEK KESÊN XWEDÎ RAYE LI RESEPSIYONÊ BÛN
Di baxçeyê qesrê de, agirê Newrozê ji aliyê Balyoz Prosor, Serokê Civaka Kurd li Almanyay û Serokwezîr Haseloff ve hat pêxistin û bi muzîkê re li dora agir govend hat gerandin. Her wiha Prof. Jan Ilhan Kizilhan derbarê efsaneya Newrozê de axivî.
Mêvanên vexwendî yên kurd, alman ên ji qadên siyasetê, aboriyê û civakê di dawiyê de li gel xwarin û vexwarinê bi hev re sohbet kirin.

Her wiha stranbêja kurd a cihû Hadassa Yesherun jî di resepsiyonê de stran gotin.