Diyarname
"Kula Faykeyê Spî" navê pirtûkek e ku ji çîrokek dirêj pêk tê. Nivîskar Yaşar Eroglu ew nivîsandiye û ji Weşanên Aryenê derketiye.
Yaşar Eroglu, di sala 1960'î de li Agiriyê li gundê Qazî hatiye dinê. Ew di sala 1981'ê de dema 21 salî ye tê girtin, bi cezayê îdamê tê cezakirin. Piştî 21 salan ji girtîgehê derdikeve. Dema derdikeve li Enstîtuya Kurdî ya Stenbolê dest bi xebatên li ser ziman dike. Li Enstîtuyê rêveberî dike, edîtoriya kovara Zendê dike, paşê di rojnameyên wekî Azadiya Welat, Ozgur Polîtîka û herî dawî di rojnameya Xwebûnê de kar dike.
Ji bilî van, Zend, Çirûsk, Rexne û Wêje, Destar, Folklora Me jî têde di gelek kovaran de, dîsa Diyarname jî têde di hin malperan de nivîsên wî tene weşandin. Heta niha 6 pirtûkên wî derketine, niha jî ya 7'an.
Pirtûka Yaşar Eroglu a 7'an çîrokek e. Çîroka bi navê "Kula Faykeyê Spî" ku pirtûk bi heman navî hatiye weşandin.
Çîrok wisa dest pê dike, "Ez nexweşê li ser nivînan im. Sal û nîveke rewşa min wisa ye. Nexweşiyeke ku roj bi roj bedenê dixwe û pûç dike li min peyda bûye." Û çîrok bi mirinê xilas dibe, "Kurê min ê herî biçûk deqa dawî hat destê min girt, min ji wî jî xatir xwest. Hêstirek ji çavên min ê rastê herikî ser dêmê min ê bi tenê mabû çerm…"
Bûyerên di çîrokê de di nav van kêliyan de diqewimin.
- Kula Faykeyê Spî / Yaşar Eroglu / Weşanên Aryen / Çîrok / 55 rûpel / 2025