Diyarname
Fotografê navdar ê bi eslê xwe ermen Ara Guler di 90 saliya xwe de vê êvarê wefat kir.

Ara Guler (Navê wî yê rastîn Aram Guleryan bû) di 16'ê gelawêja 1928'an de li Stenbolê hatiye dinê. Dema hê li lîseyê bû di her beşên sînemayê de dest bi kar kiriye û li aliyê din di Qursên Şanoyê yên Muhsin Ertugrul de dersên şanoyê dîtiye. Wî dixwest bibe derhêner an jî nivîskarê şanoyê.
Guler di sala 1950'î de di Rojnameya Yenî Îstanbul de dest bi rojnamegerî dike ku di heman demê de Fakulteya Îktîsadî ya Zanîngeha Stenbolê dixwîni.
Ji salên 50'î ve karê rojnamegerî û fotografkêşî kir. Di jiyana xwe de ji bo gelek rojname û kovaran, ji bo gelek saziyan fotograf kişandin. Gelek pirtûkên wî yên fotoyan hatin weşandin. Ji wan a bi navê "Sinan, Architect of Soliman the Magnificent" li DYA û Îngilistanê di sala 1992'yan de hat weşandin. Dûre hinê din jî bi îngilîzî hatin weşandin. Li Tirkiyeyê di sala 1994'an de "Eskî Îstanbul Anilari" (Bîranînên Stenbola Kevn), di sala 1995'an de bi navê "Yitirilmiş Renkler ve Yüzlerine Yeryuzu" (Rengên Hatine Windakirin û Di Rûyê Wan de Ser Rûyê Dinê) hat weşandin.
Herî dawî li ser wî belgefîlmekî bi navê "İstanbul'un Gozu" (Çav Stenbolê) hatibû kişandin. Guler di demên dawî de xwe nêzî hikumetê kiribû li ser vê jî nîqaş hatibûn kirin.
Guler îro ji bo qontrolê çû nexweşxaneyê lê li vê derê rewşa wî giran bû û di dawiyê de vê êvarê wefat kir. Hat gotin ku Guler qeyrana dil derbas kiriye.