Amed
Şaredariya Peyasa Amedê ji bo 3’ê Tîrmehê Roja Bikarneanîna Kîsikên Naylonî ya Cîhanî xebatek çêkir. Di vê çarçoveyê de kîsikên ji caw çêkiribûn li bajarên li mirovan belav kirin. Şaredarî dixwaze ji dêvla kîsikên naylonî ku zirarê didin xwezayê, kîsikên cawîn bêne bikaranîn.

Gerînendetiya Karên Paqijiyê û Gerînendetiya Guhertina Avhewayê û Bermahiyên Avêtî bi hev re li taxa Dîclekentê kîsikên cawîn belav kirin. Endamên Meclisa Şaredariyê û xebatkarên şaredariyê bi hev re beşdarî vê çalakiyê bûn û ziyanên torbeyên naylonî yên li ser xwezayê ji bo gel anîn ziman.
Di daxuyaniya şaredariyê de hate gotin ku li bazarên navçeya Peyasê salane 78 ton çopên plastîkî tên avêtin û hefteyê 300 hezar kîsikên naylonî tên bikaranîn. Ev hejmar nîşan didin ku qirêjiya plastîkî bi taybetî li navçeyê û bi gelemperî li welêt pirsgirêkeke mezin e. Kîsikên naylonî, ji ber ku di xwezayê de zirareke mezin didin jîngehê, axê, avê û jiyana kovî, bikaranîna kîsikên ji caw baştir e. 
Bi vê çalakiyê, Şaredariya Peyasê hewl dide hişmendiya civakê bilind bike û alternatîfên ekolojîk, wekî çenteyên cawîn teşwîq bike.