Diyarname
Erebeyeke spî hema mirovan digire, dibe û êdî haya kesî ji wan çênabe. Ev mesele niha bû mijara "Faîlî Dewlet"ê.

Em qala belgefîlmê "Faîlî Dewlet" û erebeya sipî Torosê dikin; Toros marqeyeke Renaultê ye, li bajarên kurdan di salên 90'î de bûye sedema revandina bi sedan, bi hezaran kurdan û windakirina wan.
Niha li ser van windakirin û kuştinan belgefîlmekî hat kişandin. Belgefîlmê ku navê "Faîlî Dewlet" lê hatiye kirin ji aliyê Veysi Altay ve hatiye kişandin. Veysi Altay ku zêdetir bi wêneyên wî raya giştî ew nas dikir, vê carê belgefîlm kişand.
Belgefîlmê "Faîlî Dewlet" li ser salên 1990-96'an e ku bi taybetî van salên li Cizîrê. Di van salan de di bin fermana Cemal Temizoz de tevî sercerdevan Kamil Atak, îtîrafkar Abdulhakim Guven û endamên din ên ekîba JÎTEM'ê, wan berê xwe da gelek sivîlan, ew girtin bin çavan, carinan "Li stargehê guleyek bera serê wî dan", carinan "birin herêma operasyonê û ji helîkopterê avêtin xwarê", carinan jî li gundek "di odeyeke xaniyê de ew kom kirin, hemû bi hev re kuştin ku ev derî êdî ji cenazeyan venedibû"... Û bi vî awayî ew bûn sedema kuştina bi dehan kurdan.
Belgefîlmê ku nû hatiye kişandin, li Sînemaya Atlasa Stenbolê galaya wê li dar ket. Di galayê de mebûsê BDP'ê Halil Aksoy, endamê Meclisa Partiyê yê BDP'ê Şaban Işiktaş, Hevseroka BDP'a Stenbolê Asiye Kolçak, Seroka Weqfa Başakê Şahhanim Kanat, Serokê Enstîtuya Kurdî ya Stenbolê Zana Farqînî û rêveberê Enstîtuyê Samî Tan, ji derhêner ciwan ên kurd Tayfur Aydin, Cemil Oguz, Aziz Çapkurt, dayikên ji Cizîrê yên ku xizmên wan hatine windakirin û gelek kesên din amade bûn.
Derhêner Veysi Altay li ser belgefîlm got ku dewlet heta bi windayan re rû bi rû nebe mirov nikare qala aştiyê bike; heta niha me tiştek wisa nedît. Her wiha Altay got ku gelek siyasetmedarên ku niha siyasetê dikin, di salên 90'î de tiliya wan jî di van windakirinan de heye.
Di "Faîlî Dewlet" de gelek anekdotên balkêş jî derketin holê.
Vane ji belgefîlm hin anekdot:
- Zarokek min ji ser xanî bikeve, ez wê bibim cem dixtor, dê dozger doz li min veke ku ez çima xwedî lê derneketime; lê 4 kes birin kuştin, kes tiştek nabêje.
- Dayikek li şaneşînê şîr dida zaroka xwe ya sê mehî. Gule bera wê dan û ew kuştin gotin "Ew terorîst e". Em çûn me pêsîrê wê derxist nîşan da, me got vaye şîr dide zarok ev çawa dibe terorîst. Niha ew zarok 19 salî ye.
- Kurdên ku dikuştin nasnameyên wan digirtin dibirin navenda serfermandariyê.
- Gelek kes di bin tekerên panzêran de eciqandin.
- Texsiyek sipî ku girêdayî navenda leşkeriyê bû ew digirtin bin çavan, dibirin winda dikirin. Paşê plakaya wê diguhartin, plakaya sexte lê didan û ew li nava bajêr digeriya. Navenda leşkeriyê li wî aliyê pir, li taxa Konak a Cizîrê bû û ew texsî jî li heman taxê digeriya, kes digirtin bin çavan, lê kesî pê nedizanî.

Niha li Amedê doza Cemal Temizoz, Kamil Atag û ekîba wan li Amedê didome. Piştî belgefîlm dayikek ji xizmên windayan daxwaza xwe wisa anî ziman: "Ez hêvî dikim dozgerê li Amedê dê Cemal Temizoz û ên din bernede û cezayê ku divê bide wan."

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.