Qamişlo
Konferansa Yekemîn a Jinên Kurd li Rojava bi beşdariya nêzî 300 delegeyên ji jinên partiyên siyasî, rewşenbîr, nivîskar, hunermend, rojnameger, rêxistin û tevgerên jinan, nûnerên jin ên ji saziyên Rêveberiya Xweser a Demokratîk, jinên ji Heleb û Şamê, li Bexçeyê Azadî yê li bajarê Qamişlo li dar ket.

Piştî axaftina destpêkê, çalakvana sivîl û endama Partiya Demokrat a Kurd li Sûriyeyê (El-Partî) Stêr Qasim, endama Partiya Demokrata Kurd li Sûriyeyê (Yekîtî) Sîham Emoka, Hevseroka Partiya Yekîtiya Demokratîk (PYD) Perwîn Yûsif, Berdevka Kongra Star Rîhan Loqo û Seroka Şepêla Pêşerojê ya Kurdistanê Narîn Metînî wekî endamên dîwana rêvebirina konferansê hatin hilbijartin.

Endama Komîteya Amadekar a Konferansê û Berdevka Komîteya Têkilî û Tifaqên Demokratîk a Kongra Star Rîhan Temo rapora rewşa siyasî ya Kurdistanê û Sûriyeyê xwend. Di raporê de êrîşên li ser herêma Bakur û Rojhilatê Sûriyeyê hatin nirxandin.

Piştre rûniştina `Rewşa Siyasî` ji aliyê Rîhan Emoka ve hate birêvebirin. Beşdaran jî der barê rewşa siyasî de nêrînên xwe anîn ziman.

Nivîskar Beşîra Derwêş di nirxandina xwe de bal kişand ser nêzîkatiyên desthilata Şamê û da zanîn ku ji gotin û nêzîkatiyên HTŞ`ê hêvî nayên kirin.

Endama Rêveberiya Meclisa Malbatên Şehîdan a Bakur û Rojhilatê Sûriyeyê Cewahir Osman diyar kir ku tevî hemû êrîşên siyasî yên li hemberî jinan jinan, di rêja yekem de şoreşa mirovatiyê heq kir û got, "Heqîqet û rastiya jinan di nava şoreşa jinan de derket. Bi keda şehîdan em gihane van astan û ber bi nasnameyeke cîhanî ve diçin."

Endama Partiya Sûriyeya Pêşerojê Sîham Dawûd da zanîn ku Kurd pêşengtiya sedsala 21`emîn dikin û ev li gotinên xwe zêde kir " Ji bo ku rê li ber siyasetên qirkirinê bên girtin, pêwîst e kurd mohra xwe li guhertinên heyî bixin. Di Newroza 2025`an de hate diyarkirin ku kurd pêşengtiya cîhanê dikin û xwestekên yekîtiyê derketin pêş."

EHMED: HIŞYARIYA XWE DIDE HEMÛ SÛRIYEYÊ
Hevseroka Daîreya Têkiliyên Derve ya Rêveberiya Xweser a Bakur û Rojhilatê Sûriyeyê Îlham Ehmed diyar kir ku jinên kurd li hola konferansê rûpeleke nû ji bo rojavayê Kurdistanê dinîvisînin û got: "Di vê dema hesas de çarenûsa gelê kurd tê nivîsandin. Ji bo jin rola xwe di vê pêvajoyê de diyar bike, pir girîng bû ku ev konferans tê lidarxistin. Pêvajoya Sûriyeyê tê re derbas dibe, pêvajoya avabûnê ye.  Sûriye xwedî pêkhate û çandên cuda ye, lewre gelê Sûriyeyê ji avabûna ku rêveberiya Şamê dixwaze bike hêvî nagire. Heke di vê pêvajoyê de jin nikaribe rola xwe diyar bike wê xeteriyên pir mezin li pêşiya wê derkevin. Jinên kurd li Bakur û Rojhilatê Sûriyeyê deng vedane, hişyarbûna jin heye, divê vê hişyarbûna xwe bide jinên Sûriyeyê jî."

Îlham Ehmed bi domdarî got: “Tê xwestin ku îro roj di vê gava dîrokî de hemû jin xwedî helwestên rast bin. Yekîtiya kurdan pir pir girîn e, ev pêvajoya heta astekê hatiye û em bi hêvî ne ku di demeke nêz de konferans bê lidarixistin. Ji bo Sûriyeke nenavendî tifaqa gelê kurd gelekî girîng e. Xwedîderketina li banga Rêber Abdullah Ocalan jî bandoreke erênî çêkir û xwedîderketina vê pêvajoyê gelek girîng e. Lewma ev konferans wê karibe mohra xwe li dîroka nû ya Sûriyeyê bixe.”

Fermandara Giştî ya Yekîneyên Parastina Jin (YPJ) Newroz Ehmed jî axivî destnîşan kir ku hebûna mirov bi parastinê ve girêdayî ye û ev li gotinên xwe zêde kir "Pirsgirêka kurd jî encax bi çareserkirina pirsagirkêka jinan çareser bibe. Pergalên ku ev gav nekirin, nikarîbûn pirsgirêkê xwe çareser bikin. Lewma pêwîst e xala xweparatinê di belgeyê de bê bicihkirin."

Newroz Ehmed anî ziman ku xurtkirina YPJ’ê girîngiyek e û "Bi xweparastinê felsefeya “Jin, Jiyan, Azadî” bi semboleke berxwedaniyê hate naskirin.”

Piştî temambûna konferansê dê encamname bê eşkere kirin.

**

Nûçeya Eleqedar:

- Li Rojava jinên kurd konfransa neteweyî li dar dixin