MEHRAN REMEZAN

Jina ciwan a bi navê Befrîn Îbrahîm xelkê Rojhilatê Kurdistanê ye. Hîn ji zarokatî ve heskirina wê ji bo çêkirina wêne û tabloyan hebû. Li gor ew dibêje, bi reng û tabloyan mirov dikare peyama xwe bigihîne. Ji ber wê Befrîn Îbrahîm hewl dide bi rêya xêzkirina tabloyan peyamên cuda cuda bigihîne civakê.

Ji Rojhilat hatine Başûr

Befrînê ji temenek biçûk de dest bi çêkirina wêneyan kiriye û heta niha jî berdewam dike. Hunermend Îbrahîm ev sê sal in li gel hevjînê xwe ji rojhilatê Kurdistanê hatine Başûr û li Silêmaniyê niştecih bûne. Ew li Silêmaniyê karê xwe dike û tevlî pêşangehan dibe.

Alîkariya malbat û hevserê wê

Hunermend Befrîn Îbrahîm diyar kir ku her çiqas li Rojhilata Navîn sîstema baviksalarî li pêş pêşketina jinan bûye asteng û azadiyên jinan zeft kiriye, lê malbata wê hertim jêre bûye alîkar. Ew dibêje; “Malbata min hertim bi min re bûne alîkar, niha jî ez zewicîme û hevserê min alîkariya min dike.”

Nêzî 500 tabloyan çêkine

Befrîn Îbrahîn eşkere kir ku heta niha nêzî 500 tabloyan çêkirine û bi rêya tabloyan kariye peyama rastiya bûyerên civakê bigihîne cîhanê. Îbrahîm wisa didomîne: “Êş û astengiyên ku di nav civakê de li pêş jinan hene, ji bo min bû îlham da ku ez dest bi çêkirina tabloyan bikim. Bûn sedem ku ez di xêzkirina tabloyan de berdewam bim û bixwazim bi rêya tabloyan peyama jinên êşkişandî ragihînim. Ez dixwazim bi tabloyan bibim beşek ji şoreşa ku li dijî sîstema zilamsalarî hatiye destpêkirin.”

Hin jinan bala xwe daye ser tiştên xeyalî

Di dewamê de Befrîn Îbrahîm da zanîn ku beşek ji jinan ketine xefika sîstema sermayedariyê û wiha dom kir: “Her çiqas berê jinan ji ber kevneşopiyan nedikarîn kar bikin û parastinê li mafên xwe bikin, lê niha ta radeyek azadî ji bo jinan çêbûye û jin tevlî karan dibin. Lê hinek jin ketine xefika sîstema sermayedariyê û jêhatina xwe piştguh xistiye. Hemû bala xwe dane ser ciwankarî (estetîk) û tiştên xeyalî. Bi rêya neştergeriyên ciwankariyê bedena xwe wekî amûran lêkirine. Lê divê hemû jinan kar ji bo mafên jinan bikirana.”

Tevlî 6 pêşangehan bûye

Befrîn Îbrahîm diyar kir ku heta niha tevlî şeş pêşangehên li rojhilatê Kurdistanê bûye. Befrîn got “Ez plan dikim li gel hin hevalên xwe yên din ku ew jî xelkê rojhilatê Kurdistanê ne û li Silêmaniyê niştecihin, li Silêmaniyê jî pêşangehên şêwekarî vekin.”