Diyarname
Fîlmê derhêner Rêzan Yeşilbaş ê bi navê "Bêdeng" ku li ser rewşa girtîgeha Amedê ya dema Derbeya 12'yê Rezberê ye li 65'emîn Festîvala Fîlman a Cannesê de derket pêşberî juriyê.

Rêzan Yeşilbaş derhênerekî ciwan ê ji Amedê ye. Di dema Derbeya 12'yê Rezberê de dema bavê wî girtî dibe bi diya xwe re diçe girtîgehê lê kurdî qedexe ye û bêdengî dest pê dike. Ev bêdengî hê wê çaxê tesîr li Yeşilbaş dike û niha wî kurtefîlmekî bi navê "Sessiz (Bêdeng)" kişandiye. Fîlm bêdeng balê dikişîne ser rewşa Girtîgeha Amedê ya serdema Derbeya 12'yê Rezberê. Di fîlmê 7 deqîqeyî ku Belçîm Bilgin û Cem Bender serlîstikvaniya wî dikin de, qala çîroka girtiyek ku di sala 1984'an de li Girtîgeha Amedê ye û jina wî tê kirin.

Rêzan Yeşilbaş ku di sala 1977'an de hatiye dinê di sala 2008'an de ji Beşa Sînema-TV ya Zanîngeha Marmarê mezûn bûye û ji heman salê asîstaniya derhêner Zeki Demirkubuz dike.

Yeşilbaş kurtefîlmekî kişand û bi vê yekê karî here Cannesê. Kurtefîlmê "Bêdeng" di heman demê de li Cannesê di beşa pêşbaziyê de ye ku ev yek bi xwe serketinek e.

Juriya Cannesê di beşa kurtefîlman de ji 4500 kurtefîlmên serî lêdane 10 heb hilbijartin û ew niha di pêşbaziyê de ne. "Bedeng" jî yek ji wan e.