Zekî Ozmen

Nivîskar Celîlê Celîl û Eskerê Boyik ji aliyê Kurdische Gemeinde Deutschland - Civaka Kurd Li Almanya (KGD) bi Xelata Wêjeyê ya Ehmedê Xanî ya 2023’yê tên xelatkirin. Merasima xelatê wê roja 5’ê gulanê li salona Hermann Levi ya şaredariya bajarê Giessen li dar bikeve. 

NÎZAMETTÎN ARÎÇ JÎ BI MUZÎKÊ BEŞDAR DIBE

Di merasima xelatê de Şaredarê Bajarê Mezin ê Giessen Frank-Tilo Becher dê axaftina pîrozbahiyê bike û hunermend Nîzamettîn Ariç jî bi stranên xwe yên ku gelek ji wan ji gotinên Eskerê Boyik pêk tên pêşkêş bike. Her wiha axaftina pesindayîna Prof. Celîlê Celîl wê ji aliyê Mehmet Gultekin û ya Dr. Eskerê Boyik jî wê ji aliyê Kara Wezîrê Eşo ve were pêşkêşkirin. Moderatora merasimê jî wê Hêja Netirk be. Xelata ku bi giştî ji 5 hezar euroyan pêk tê, îsal cara ewilî ye tê dayîn.

HER DU SALAN CAREK DÊ BÊ  DAYÎN

Cîgirê Serokê Civaka Kurd Li Almanya Mehmet Tanriverdi derbarê babetê de ji bo Diyarnamê da zanîn ku ew ê her du salan carekî vê xelatê belav bikin û ev agahdarî jî da: “Amadekariyên vê yekê beriya du salan hatin kirin lê belê ji ber pandemiyê em neçar man vê yekê paş de bidin. Em gelekî kêfxweş in ku du nivîskarên xwedî kedeke mezin in wê bên xelatkirin.”

PIRTÛKÊN WAN JÎ DIKIRE

Hêjayî gotinê ye ku KGD di çarçoweya xelatkirinê de bi armanca piştgiriya her du nivîskaran bi giştî bi buhayê hezar euroyî pirtûkên wan jî kirîn. Ji bilî berhemên Prof. Celîlê Celîl û Dr. Eskerê Boyik, wê Feryad Fazil Omar jî dîwana Mem û Zîn ku wergerandibû almanî li salona meresimê îmze bike.

Kurdische Gemeinde Deutschland - Civaka Kurd Li Almanya (KGD) ji niha pê de dê du salan carek vê xelatê bide kesên ked dane wêjeya kurdî.

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.