Diyarname
Komeleya Nivîskarên Sûriyê nameyeke eşkere ji bo Yekîtiya Nivîskarên Rusyayê (YNR) şand û xelatkirina Beşar Esad a ji aliyê YNR'ê ve rexne kir.

Em nameya Komeleya (Malbenda) Nivîskarên Sûriyê bi wergera Helîm Yûsiv a ji bo kurdî diweşînin:

***

"Ji bo yekîtiya nivîskarên Rûsyayê
 
Birêz Valerî Ganişiyêv, Serokê Yekîtiya Nivîskarên Rûsyayê
 
Silaveke wêjeyî
 
Bi matmayîneke mezin, me û gelê me yê Sûriyê nûçeya xelatkirina serokê Sûriyê Beşar Elesed, bihîst. Ev zordarê dijmirov yê ku ji deh mehan de, fermanên kuştina xelkên me yên serhildêr  dide artêşa rêjîma xwe, çete û hêzên ewlekariya xwe. Ev rewş  jî weku nûçe li çaraliyên cîhanê, di riya çapemeniya dîtbarî û nivîskî re, tên belavkirin.
 
Fermanên  vî  kujerê ku we ew xelatkiriye heta niha bûne sedema kuştina 6500 kesî, di nav wan de 450 zarok û 300 jin hene. Bi sedan di bin işkencekirinê û azarê de mirin û bi dehhezaran girtî, firar û reviyayî hene ku li welatên derûdora Sûriyê bûne penaber. Ji bilî bi hezarên widayiyan.
 
Gelek dezgehên navneteweyî yên serbixwe, wekî rêxistina lêborînê ya navneteweyî û rêxistina Human Rights Watch û komîta mafê mirovan ya girêdayî yekîtiya neteweyan, di raporên xwe de piştrast kirin ku ev rêjîm di ber tawanên şer de berpirsiyare û gelek tawanên dijî mirovahiyê li hember miletê Sûriyê kirine.
 
Bi vî awayî xelatkirina we ya vî kujerê serêxwexwarî  kuştineke ji berpirsiyariya rewşenbîr ya exlaqî û siyasî re, herweha  biçûkxistineke  ji bo miletê me yê ku ji bo rûmeta xwe serî hildaye, wisa jî li çanda rûsî û ji miletê rûs re.

Ji bom me cihê matmayîn û şermezariyê ye ku yekîtiya nivîskarên Rûsyaya mezin, welatê  Puşkin, Gogol, Lermontov, Dostoevsky, Torginêv, Tolstoy, Tçixov, Mayakovsky û Gorkî, xelatê bide xwînrêjekî  ku miletê xwe dikuje. Herwisa em, di sedemên vê kirina we de, tênagihêjin.
 
Hetanî yekîtiya nivîskaran ya girêdayî rêjîma Sûriyê ev yeka nekir. Pirsa me jî ev e; gelo piraniya 750 hezar endamên we bi beşdarbûna di kirineke wisa bêrûmet de, beşdarin?

Xelatkirina desthilatdarekî destbixwîn ku rojane kirinên qirkirina dijî miletê xwe birêvedibe. Bi sedan zarok, jin kuştine û bi sedan helbestvan, nivîskar, rojnamevan û hunermend avêtine binê zindanan.
 
Cihê mixabiniyêye ku ew behaneyên we ji  bo vê xelatkirina vî kujerî  rêzkiribûn bêhna dijminayiya bi miletê me re ji wan dihat, ku di wan de şoreşa miletê me ya ji bo demoqratiyê weku komployekê  tê nîşandan. Hetanî bi rêveberiya siyasî ya rûsî ku çekan dide rêjîma me ya kujer, di zêdegavavêtinê  de negihiştiye vê radeyê.

Em birêzgirtin ji we re dinîvisînin û ji we hêvî dikin ku hûn vê biryara xwe ya cihê matmayînê di bin çavan re derbas bikin. Ev biryara ku helbestvan, nivîskar û rewşenbîrên rûs weku alîgirên kuştin, teror û tawanên hovane nîşan dide.
 
Hêviya me ew e ku hûn  xelata xwe  ji vî kujerî  paş de bikşînin û em li benda wê yekê ne,  ku hûn piştgiriya miletê me yê ku şoreşê birêve dibe, bikin û di van rojên dijwar de li kêleka wî bisekinin.
 
Komeleya (Malbenda) nivîskarên Sûriyê"

***

Nûçeya eleqedar:

- Komeleya Nivîskarên Sûriyê ava dibe