Diyarname

Ji bo ku zarokên kurd jî ji şanoyê bêpar nemînin lîstika “Şengê û Pengê” ji bo wan derdikeve ser dikê. Lîstik piştî Mêrdînê vê carê li Stenbolê tê lîstin.

Teatra Zîv, li Mêrdînê ji bo lîstika “Şengê û Pengê” hate cem hev û li ser xwesteka “Ji bo zarokan em dikarin çi bikin?” hate avakirin. Lîstikvanan bi provayên êvarî, lîstika xwe di nav meh û nivekê de derxistin ser dikê. Lîstik pêşî li Mêrdînê roj 5’ê adara 2014’an, dûre li navçeyên Mêrdinê û her wiha li Amedê derket pêşberî temaşevanan û nêzî sê hezar kesî lê temaşe kir. “Şengê û Pengê” niha jî li Stenbolê derdikeve ser dikê. Lîstik wê roja 26’ê vê mehê li Stenbolê, li Su Gosteri Merkezî sate 14.00’an de bê lîstin.  

Derhênerê lîstikê Çetoyê Zêdo ye. Ew bi vê lîstikê dixwaze balê bikşîne ser folklora kurdî û malzemeya teatral yên di folklora kurdî de. Çîroka “Şengê û Pengê” li hemû herêmên Kurdistanê bi navên cuda tê zanîn. Derhêner Zêdo taybetî ji bo zarokan çîroka Şengê û Pengê wekî şano ji nû ve nivîsiye û derheneriya lîstikê jî kiriye.

Teatra Zîv komeke nû ya şanoyê ye û ev yekemîn lîstika wan e. Her wiha Şengê û Pengê wekî pirtûk jî ji Weşanên Filîtto derket.

Di koma şanoyê ya bi navê Teatra Zîv de wekî lîstikvan Umît Aktaş, Zelal Yildirim, Sultan Çaça, Hediye Cevizci, Zeynep Guneş, Ronî Tuzun, Mehtap Yildirim û Hossain Zêdo cî digirin.

Çîrok Şengê û Pengê 

Çavşîna Bizin û du karikên xwe, yên bi navê Şengê û Pengê, di şikeftekê de dijîn. Ji bo ku Çavşînê, Şengê û Pengê bi şîr xwedî bike her rojê diçe li zozanan diçêre. Dema Çavşînê ji mala xwe derdikeve, karikên xwe tembî dike ku ji bilî wê derî li tu kesî venekin. Ji bo ku karikên wê jî derî lê vekin "Starana Şîr" dibêje. Ev staran dibe paroleya wan û tene ew pê dizanin. 

Jiyana wan her rojê wiha bi kêgxweşî didome. Rojekê, dema ku Çavşînê diçe zozanan, Guro bi wan dihise. Piştî ku bizin diçe, tê ber deve derî û karikan dixapîne... Çavşînê dema vedigere, dibine ku derî vekiriye û karikên wê ne li wir in. Çavşîna Bizin bi hêrs li zarokên xwe diğere. Ji Hirçê û Rovî dibîhîse ku Guro karikên wê biriye. Diçe bi Guro re şer dike û herdu karikên xwe ji Guro xelas dike...

Derhêner Çetoyê Zêdî li ser lîstika zarokan û lîstika Şengê û Pengê ev yek ji bo me got: “Ji bo şanoya zarokan berhem kêm in, lê kêmasî ne ji vê yekê ye. Zarok li her derê zarok e, lê bi kurdî zaroktî tiştekî wêdetir e. Mezin ji dest me çûn, bila zarok ji dest kurdî neçin.”

Mikurhatinek ji bo kenê zarokan

Zêdo ji bo şanoya kudî dibêje ger em dixwazin temaşeva xwe zêde bin divê em bi baldarî nêzî zarokan bibin wiha didomîne: “Gere em ji bo zarokan gelek berhem û pêşandeyên din derxinîn, ev deynê me ye. Ku mirov hinekî bi xîret be, bi derfetên hêsa dikare gelek şanoyên ku bala zarokan tevî mezinan derîne. Ku mirov carekê çav li kenê zarokan bibe û wê gelek tiştên din bixwaze ji bo wan bike, ez dibêm me ji bo zarokan û kenê wan heta niha xwe neêşandiye, ev jî bila wekî mikurhatinekê be.” 

Derhêner Zêdo dibêje bi xîreta şanoger û dezgehên kurdî mirov dikare ji bo zarokan û mezinan pêşandanên baştir derxe ser dikê û van yekan lê zêde dike: “Şanogerên me tenê bala xwe bidin folklora kurdî ew ê pêrgî bi sedan çîrok û naverokên têr û tije bibin, hemû tişt di vê xîretê de ye. Tenê bila dest pê bikin û li der û dora xwe binêrin, şanoya cihanê çi dikin, ew çawa dikin? Wê demê xweştir tê dîtin ku divê em jî çi bikin yan çi nekin.” 

Kunye

Lîstik: Şengê û Pengê

Nivîskar/Derhêner: Çetoyê Zêdo

Cigirê Rejî û Dramatûrjiyê: Umit Aktaş

Şêwirmendê Folklor û Adaptasyonê: Sîdar Jîr

Asîstana Rejiyê: Sultan Çaça

Muzîk: Ardîxan

Dekor: Hediye Cevizci

Kostum: Zeynep Guneş

Makyaj: Mehtap Yildirim

Efekt û Ronahî: Ronî Tuzun

Karîkatur: Musa Yildiz

Afîş: A.Rahman Çelik

Mawe: 35 deqe

Temaşevan: +6

Lîstikvan:

Çavşînê/Dayê: Zelal Yıldırım, Sultan Çaça

Şengê: Hediye Cevizci

Pengê: Mehtap Yıldırım, Zeynep Güneş

Guro: Ümit Aktaş, Hossain Zêdo