Zekî Ozmen

Fîlmê nû yê derhêner Fatih Akin “Rheingold” ku li ser jiyana rapvanê almanî yê kurd Xatar e, êvara pêncşemê li sînemeyan ket vîzyonê. Di şeva ewilî ya pêşkêşkirina fîlm de li gelek sînemeyan cîh nema. Çav li rê ye roja înê û dawiya hefteyê jî gelek kes nikaribin bilêtan peyda bikin.

Xatar bi navê xwe yê rast Jîwar Hajabî bi eslê xwe ji Sine ya rojhilatê Kurdistanê ye. Kurê dîrîgent û şefê Orkestraya Netewî ya Koma Berxwedan Îqbal Hajabî yê salên 1990’an e. Hem orkestrayên ji bo festîval û Med tv û hem jî gelek albumên Hunerkomê yên orkestrayî di bin serpereştiya Îqbal Hajabî de hatibûn çêkirin.

KARÊN DERQANÛNÎ Û TILYAK

Xatar bi xwe bi taybetî bi kiryarên xwe yên derqanûnî gelek caran ket rojevê. Firotina madeyên hişber û di sala 2009’an de diziya zêran bi buhayê 1,8 mîlyon Euro ji erebeyeke zirxî ya veguhestinê ji hinek kiryarên wî yên berê ne. Piştî diziya zêran ew çûbû başûrê Kurdistanê û ji wir radestî Almanyayê hatibû kirin. Wî di girtîgehê de bi dizî albûmeke rapê çêkiribû û wê albûmê jî nav vedabû.

Xatar ji ciwaniya xwe ve bi rapê ve mijûl e û yek ji serkêşê rap a alman e. Şirketa wî ya bi navê “Alles oder Nix” rêya gelek hiphopvan û rapvanên nû vedike û wan dixe nav piyaseya muzîka alman.

BANDORA WÎ YA LI SER CIWANAN

Her wiha ev demeke ew bi karê bazirganiyê ve jî mijûl e. Xwaringeh û salonên nargîleyê, markeya wî ya bi navê “Haval” a koftê û markeya wî ya bi navê “G’lato” ya bestamiyê di nava ciwan û hejêkiriyan wî de gelekî eyeqeyê dibînin. Ew ji aliyê hejmareke bilind a ciwanan ve wekî îdol tê dîtin û her wiha bandora wî li ser belavbûna nasîna nasnameya kurdî di nava nifşê nû yê Almanyayê de heye.

LÎSTIKVANÊN NAVDAR

Ji hêla din ve di fîlmê “Rheingold” ê li ser jiyana Xatar de gelek diyalogên bi kurdî jî hene û her wiha ew bi cilên kurdî tevlî galayên danasîna fîlm ên li Hamburg û Kolnê bû. Di galayan de dayik û bavê wî jî amade bûn. Fîlm ev bi rojan e di medyaya alman a sereke de cihekî taybet digire.

Di fîlmê şirketa Warner Bros belav dike de Emilio Sakraya rola Xatar û Mona Pîrzad jî rola dayika wî Rasal Hajabî dilîze. Her wiha lîstikvanên wekî Kardo Rezzazî yê kurê hunermend Nasir Rezzazî û aktrîstê tirk Ugur Yucel jî dilîzin.
Fragmanê fîlm: