Diyarname

8'emîn Festîvala Şanoyê ya Amedê li Amedê dest pê kir. Festîvala ku ji aliyê Şanoya Bajêr a Amedê ve tê organîzekirin êvara 20'ê mehê dest pê kir. Derhêner û lîstikvana şanoyê Berfîn Emektar daxuyaniya festîvalê xwend û festîvalê bi awayî fermî dest pê kir.

Di daxuyaniyê de wisa hat gotin, "Berdêla wê çi dibe bila bibe, ji bo jiyaneke nû em li ser dikê ne. Ji bo ku em di nava êşa ku şer, mêtingerî, bêdadî û qirkirina çandî afirandine de têk neçin, em ê bibêjin ku tarîtiya vê serdemê ne çîrok e. Em ji bo vê yekê li ser dikê ne. Ji bo ku em serpêhatiya xwe ji nifşekî derbasî nifşekî din bikin, di guhê wan de bibêjin û carinan jî biqîrin em li ser dikê ne." 

Di daxuyaniyê de hat gotin ku "Heta ku em careke din strana xwezaya ku hatî talankirin bibihîzin, heta ku tevahiya rehên di binê axê de veşarî yên darên ku li daristanên hatine şewitandin careke din şîn bin, heta ku Çiyayê Cûdî bi pelên xwe yên şînbûyî serkeftina xwe biqîre, em li ser dikê ne" û bi vî awayî dom kir: "Heta ku qîrîna azadiya jinê li tevahiya cîhanê û bi taybetî jî di van demên dawî de li Îranê, hişmendiya mêrsalarî serobino bike, em li ser dikê ne. Ji bo ku em bigihîjin heqîqetê, em ê li ser van dikan wêneyê zilmê û tarîtiyê xêz bikin. Lewra rastî her û her li cihekî li van deran e. Em ji bo Cûdî, Jîna  Emînî, karkerên madenan, çand û hunera xwe, zimanê xwe li ser dikê ne. Em li hemberî kesên ku bi çekên kîmyewî sûcên şer pêk tîne, li hemberî tecrîd û zilma di girtîgehan de li ser dikê ne. Em li ser dikê ne û li vir in. Zimanê me li vir e, hunera me li vir e, gelê me li vir e, darên me li vir in û rehên me li vir in. Wekî ku helbestvan Arjen Arî jî gotîye: Va ye Cûdî û va ye ev ax!”

Piştî daxuyaniyê lîstika "Hema Hema Jin Elizabetl" hat lîstin û festîvalê deriyên xwe vekirin. Lîstika Hema Heta Jin aîdê Dairo Fo ye. Lîstika ku Dilawer Zeraq wergerandiye kurdî, Berfin Emektar derhêneriya wê kiriye. Di lîstikê de Elvan Koçer, Perînaz Delazy, Yavuz Akkuzu, Ozcan Ateş, Şena Ozbey û Ozkan Şeker dilîzin.


Daxuyaniya festîvalê lîstikvan û derhêner Berfîn Emektar xwend. (Foto: MA)

 ***

Ji bo bernameya festîvalê nûçeya Eleqedar:

- Festîvala Şanoyê ya Amedê amade ye