Diyarname

Cîhana ereb ji bo fûtbolê gelek pere xerc dike. Li Ewropayê tîman dikire û bi rê ve dibe. Niha jî Katarê bi hêza xwe karî fûtbolê, Kûpaya Cîhanê bibe mala xwe. Katar li Rojhilata Navîn yekemîn welat e ku mazûvanî ji bo vê tûrnûvayê dike. Di heman demê de, di nav welatên ku heta niha mazûvanî kirine de welatê herî biçûk e. Kûpaya Cîhanê ya 2022’yan li Katarê dê li dar bikeve lê hin pirsgirêk hene.

Bi rêzê em binivîsin, serjimariya Katarê 3 mîlyon e lê tenê 380 hezarê wê hemwelatiyên welat in. Di gelek warî de pêdiviya Katarê bi derve heye. Dê tûrnûva li dar bikeve, dê gelek kes bên welat. Li gor texmînan dê di mehek de 1.2 mîlyon kes herin Katarê. Loma jî di gelek warî de pêdivî bi xebatkaran heye. Yek ji pêdiviyan jî ewlehî ye. Di vê çarçoveyê de polîsên tirk dê herin Katarê. Li gor nûçeya Reutersê ji 3 hezarî zêdetir polîsên tirk dê herin Katarê û di dema Kûpaya Cîhanê de peywir bigirin ser xwe. Katar ku ev çend salên dawî ne gelek piştgiriya aborî dide Tirkiyeyê, di vî warî de alîkarî ji Tirkiyeyê girtiye. 

Nûçe dibêje dê 3 hezar polîsên hêzên çevîk, 100 polîsên tevgera taybet, 50 pisporên bombeşikên û 80 kûçikên polîsan dê di nav de hebin. Rayedarên ku agahî dane Reutersê gotine ku berpirsên vê hêzê jî dê tirk bin, û ew dê bi rê ve bibin.

Hat gotin ku ligel Tirkiyeyê dê Pakistan jî polîsan bişîne Katarê ku meha borî li meclisê ev pêşnûmaya şandinê qebûl kir.