Diyarname

32'yemîn Lîstikên Havînê Olîmyipata 2020'î piştî salek bi paş ve xistinê li Tokyoyê li dar ket. Olîmpiyata Tokyo 2020'î divê par li dar biketa ji ber pandemiyê wekî gelek çalakiyan ji bo îsal hatibû bi paş ve xistin. Îsal jî gelek hat nîqaşkirin ku li dar bikeve yan na, lê di dawiyê de olîmpiyatê dest pê kir.

Merasima lidarxistina olîmpiyatê li Stada Neteweyî ya Tokyoyê bi merasimeke mezin dest pê kir lê bê temaşevanan. Ji 15 welatên cuda nûner beşdarî merasimê bûn. Serokomarê Fransayê Emmanuel Macron, Serokwezîrê Moxolistanê Luvsannamsrai Oyun-Erdene, jina Serokdewletê DYA'yê Joe Biden Jill Biden jî di nav beşdaran de bû.

BÎRANÎN ÇÊBÛ

Sporkarên beşdarî olîmpiyatê dibin di merasimê de meşiyan.

Di merasima destpêkirinê de kesên ji ber vîrusa koronayê mirine hatin bibîranîn. 11 sporkarên ji Îsraîlê ku di sala 1972'yan de di Olîmpiyata Munîhê de jî hatibûn kuştin hatin bibîranîn. Bi vê bû yekemîn car ku ev sporkarên Îsraîlê di destpêkirina Olîmpiyateke de têne bibîranîn.

HEJMARA SPORKARAN

Di 42 cihên sporê yên Tokyoyê de dê çalakî li dar bikevin. Olîmpiyat 15 rojan dê li dar bikeve. Bi temamî 11 hezar sporkar di 33 beşan de dê bi hev re bikevin pêşbaziyê. Ev hejmara sporkaran di dîroka Olîmpiyatan de reqema herî zêde ye.

Li Japonyayê di navbera 12'ê tîrmehê heta 22'yê gelawêjê de ji bo Covid-19 Rewşa Awarte ragihandiye. Ji ber vê çalakî jî dê bê temaşevanan li dar bikevin.

EURO 2020 JÎ ÎSAL LI DAR KET
Par gelek çalakiyên navneteweyî ji ber pandemiyê hatibûn betalkirin yan bi paş ve xistin. Tûrnûvaya fûtbolê ya Ewropayê Euro 2020 jî par ji bo îsal hatibû bi paş ve xistin û îsal li dar ket. Cupa America jî îsal li dar ket.