Diyarname
Ev çendek e her lîstik û konserên bi kurdî têne qedexekirin, vê carê Walîtiya Edeneyê lîstika bi kurdî qedexe kir. Walîtî lîstika Şanoya Bajêr a Amedê "Tartuffe” qedexe kir.
Şanoya Bajêr a Amedê dixwest 5’ê vê mehê li Salona Şanoyê ya Şaredariya Bajarê Mezin a Edeneyê lîstika xwe “Tartuffe” pêşkêş bike lê Walîtiya Edeneyê destûr neda. Walîtî gotiye ji ber “Zagona Îdarî ya Bajêr bi hejmara 5442, xala 11’an, beşa C, lîstina wê guncan nehatiye dîtin”.
Organîzekarê lîstikê Suat Ekin ji midûriyeta çandê ya Şanoya Bajêr a Edeneyê ji wan xwestiye herin ji Walîtî destûrê bigirin, hûn destûrê negirin em nikarin lîstikê bidin lîstin û em li Walîtî geriyan, Walîtî destûr neda. Ekin wisa gotiye, “Di qaxiz de ‘guncan nehatiye dîtin’ nivîsîne. Ev yek li hemberî kurdî bêtehamulî ye. Em vê yekê qebûl nakin.”
Lîstika “Tartuffe” ji teksta Moliere hatiye girtin. Moliere ev lîstika xwe di sala 1664’an de nivîsandiye û ji wê rojê heta niha bi gelek zimanan hatiye belavkirin, bi gelek zimanan derxistine ser dikê. Şanoya Bajêr a Amedê yekem car di sala 2018’an de ev lîstik derxistibû ser dikê.
Lîstika ku Şêxmus Sefer wergerandiye, derhêneriya wê Ruknettîn Gun kiriye. Di lîstika yek perdeyî de Yavuz Akkuzu, Ozcan Ateş, Berfîn Emektar, Elvan Koçer, Hamdusena Ozbey, Şahperî Alphan, Şîlan Alagoz, Salih Yildizoz û Ozkar Şeker dilîzin.
LI MÊRSÎNÊ YE
Li aliyê din heman lîstik 6'ê mehê dê li Mêrsînê bê lîstin. Ji bo lîstika li Mêrsînê destûr hatiye girtin.
***
Di van rojan de çend çalakiyên hunerî yên hatine qedexekirin:
- 21 saziyên kurdî li hemberî qedexeyê daxuyanî dan
- Li ser qedexeyên çalakiyên kurdî çend agahiyên nû
- Qeymexamiya Tetwanê lîstika kurdî qedexe kir
- Konserên Mem Ararat û Aynur Doganê hatin qedexekirin
- Vê carê li Bedlîsê konsera bi kurdî hat betalkirin
- Lîstika bi kurdî “Don Kîxot” jî hat qedexekirin
- Nawey konserê Kahramanan hame qedexekerdişî
- Şaredarê AKP'yî konsera hunermend Aynur Dogan betal kir
***
Nivîseke li ser "Tartuffe"
- "Commedia Dell'Arte ya Kurdî" Tartuffe