Diyarname
Keştiyeke şer a Rusyayê ku navê “Moskova” lê bû çend roj berê hat îdîakirin ku lê xistine. Wezareta Parastinê ya Rusyayê îro got ku dema kruvazorê “Moskova”yê dikişand bênderê ji ber rewşa xirab a hewayê noqav bûye.
Mesele bi vî rengî ye: Roja çarşemê Ûkraynayê îdîa kiribû ku wan li keştiya şer a Rusyayê daye. Wezareta Parastinê ya Rusyayê jî gotibû ji ber ku di keştiyê de şewat çêbûye muhîmatê têde teqiyane û keştiyê zerar dîtiye. Û îro dema ew kruvazora keştiyê dikişand bênderê keştî noqav bû.
Li ser vê yekê BBC vê êvarê nûçeyeke belav kir. Li gor agahiyên di nûçeyê de 510 kes di keştiyê de dixebitiyan û ev keştî yek ji sembola leşkerî ya pêşeng a Rusyayê bû û li hemberî Ûkraynayê bi ser behrê de pêşengî dikir. BBC dibêje ku Ûkrayna dibêje me bi fuzeyê lê daye lê Rusya qala êrîşeke bi vî rengî nake, lê roja pêncşemê çapemeniya dewletê ya Rusyayê gotibû ku keştî winda bûye.
BBC dibêje ajansa nûçeyan a dewletê Tassê gotiye ku ji ber teqîna muhîmatê di gewdeyê keştiyê de xisar derketibû, dema keştî dikişand bênderê ji ber vê xisarê hevkêşeya xwe winda kiriye û ji ber pêlên behrê noqav bûye.
Rusyayê di sala 1979’an de ev keştî çêkiribû û di sala 2020’î de ji nû ve tamîr kiribû. Li ser keştiyê 16 heb fuzeyên ji keştîavêj hebûn ku menzîla wan 700 kîlometre ye. Di heman demê de keştî bi pergala parastina hewayî ya S-300 jî hatibû sazkirin.