Diyarname

Pirtûkeke nû ya helbestan a Selîm Temo xwe gihand ber destên xwendevanan: "Pûnga Li Bajêr". Pirtûk ji Weşanxaneya Dara derket.

"Pûnga Li Bajêr" ji du beşan, ji 33 helbestan pêk tê. Di helbestan de rêwîtiya helbestvan xwe nîşan dide. Ew carinan xwendevan dibe 1984, Taxa Hizûrê, carinan bi "Penelopeyê heft mêr kirin, heya vegeriyam mal", carinan dibêje "êdî dereng e bibim şivanê stêrkan, dest bi kursa Spanyolî bikim" û carinan jî tenêtiyê rêz dike: "Tenêtî xewnek e, li asîmanê min digere." Û helbesta wî ya herî kurt "Delîl" e ku ew jî bi vî rengî ye:

"Xêr e her derew

ku bo jinan hatibe kirin".

Helbestvan Selîm Temo roja 27'ê avrêla 1972'yan li gundê Mêrînaya Batmanê hatiye dinê. Heta niha bi ser dehî re pirtûkên wî yên bi kurdî û tirkî derketine. Li aliyê din bi van xebatên xwe hinek xelat jî girtine. "Pûnga Li Bajêr" pirtûka wî ya dawî ye.

- Pûnga Li Bajêr / Selîm Temo / Weşanên Dara / Helbest / 77 rûpel / 2021