Diyarname

Îro 15'ê sermawezê Roja Nivîskarên di Girtîgehê de ya Dinyayê ye. Di vê rojê de nivîskarên girtî têne bibîranîn û xwedî li wan tê derketin. Hem ji bo vê rojê hem ji bo keda wî em îro portreya nivîskarekî kurd ê girtî derdixin pêş, portreya Menaf Osman.

Menaf Osman kurdekî ji Binxetê, bi gotina din ji Rojava ye. Ew di sala 1965'an de li Helebê hatiye dinê. Dibistana seretayî, navîn û lîse li vî bajarî xwendiye û ji bo xwendina zanîngehê çûye Şamê. 

Menaf Osman xwendina xwe li Zanîngeha Şamê di Beşa Jeolojiyê de temam kiriye.

Nivîskar Menaf Osman ku bi rihê welatparêzî mezin bûye, di ciwaniya xwe de ketiye nava siyasetê. Û di sala 1993'yan de li Çiyê hatiye girtin. Cezaya muebetê li nivîskar Menaf Osman birîne û ev 28 sal in girtî ye.

Osman berî bê girtin jî û ji dema hatiye girtin jî ji bo gelek kovaran nivîs nivîsiye. Ji roja ku hatiye girtin heta niha her pênûsa xwe bikar aniye û nivîsiye, berhem dane. Heta niha nêzî 10 pirtûkên wî li Bakur çap bûne. Herî dawî vê mehê pirtûka wî ya çîrokan bi navê "Sol" ji Weşanên Aryen derket.

Ew 28 sal in girtî ye û li hundir pêvajoya xwe ya afirandina berheman didomîne. 

Va ne pirtûkên Menaf Osman ên ku heta niha derketine

- Girê Şêran / Roman / Weşanên Aram / 2003

- Şînok / Çîrok / Weşanên Lîs / 2011

- Namûsname / Roman / Weşanên Aram / 2016

- Piling, Şoreşname 1 / Roman / Weşanên Ar / 2016

- Silava Bajariyan / Çîrok / Weşanên Azad

- Sînor / Roman / Weşanên Aryen / 2018

- Lênûska Leyla / Roman / Weşanên Aram / 2018

- Sêbareya Zindanê - 1: Cuhû / Roman / Weşanên Sîtav / 2019

- Sol / Çîrok / Weşanên Aryen / 2021