SILÊMANÎ

Bi fermî lihevkirina Tevgera Goran û Yekîtiya Nîştimanî Kurdistan (YNK) ya ji bo hilbijartina parlementoya Iraqê hat îmzekirin.

Îro bi merasîmek Hevserokên YNK’ê û Rêkxerê Tevgera Goran lihevkirina navbera her du aliyan a ji bo hilbijartina Iraqê îmze kirin.

Di merasîmê de Rêkxerê Tevgera Goran Omer Seyîd Elî axivî û got, “Piştî çend civînên li gel YNK’ê me li hev kir û ev lihevkirin jî ji bo pêkanîna hevpeymaniya hilbijartinên dema pêş a Iraqê ye.”

Hevserokê YNK’ê Bafil Talebanî jî got ku wan soz daye rêkxerê Tevgera Goran ku ev lihevkirin ne li dijî tu aliyek e, ji bo yekrêziya Kurdistanê ye.

Talebanî got; “Dixwazim li vir sozek din bidim ku em carek din Tevgera Goran di cih de nahêlin. Naxwazim ev lihevkirin tenê ji bo vê hilbijartina dema pêş be, dixwazim hertim bi hev re bin.”

Di merasîmê de Hevserokê YNK’ê Lahor Şêx Cengî jî got: “Erkê serokatiya Hevpeymaniya Kurdistanê dane min, ez ê bi dilsozî bêyî cudahî hewil bidim Hevpeymaniya navbera YNK û Tevgera Goran bi serxim. Ger em ne yekrêz bin nikarin armancên xwe bidestxin. Ji bo wê erkê me hemûyan e em vê hevpeymaniyê wekî çavê xwe biparêzîn.”

YNK û Tevgera Goran di çarçoveya Hevpeymaniya Kurdistanê de wê tevlî hilbijartina Parlementoya Iraqê bibin ku tê payîn 10’ê Cotmeha/Kewçêra îsal pêk were. Lihevkirina navbera YNK û Tevgera Goran roja 30’yê Nîsana/avrêla îsal li komîsyona bilind a hilbijartinên Iraqê hatibû tomarkirin. Îro jî ev lihevkirin bi fermî hat îmzekirin.

Ji Rojnewsê hatiye girtin