AMED - MA

Ji bo zimanê kurdî bibe zimanê fermî kampanyaya îmzeyan hatibû dest pê kirin. HDP'yî di vê çarçoveyê de li Baglara Amedê mal bi mal digerin û îmzeyan berhev dikin.

Komîsyona 21’ê Sibatê/Reşemiyê ya ji aliyê Tora Ziman û Çanda Kurdî û Platforma Zimanê Kurdî ve hatibû avakirin, ji bo ku zimanê kurdî bibe zimanê fermî û perwerdehiyê, roja 22’yê reşemiya 2021'ê dest bi kampanyaya berhevkirina îmzeyan kiribû. Kampanya li bajarên kurdan û li Tirkiyeyê didome. Hem bi awayê fîzîkî û hem jî bi rêya onlînê îmze têne berhevkirin. Heya niha bi deh hezaran îmze hatine berhevkirin. Lê ji ber bergiriyên pandemiyê, qedexeya derketina kolanan û operasyonên siyasî bi astengiyan re rû bi rû ma. 

15 HEZAR ÎMZE 

Rêveber û endamên Rêxistina Partiya Demokratîk a Gelan (HDP), ji bo kampanyayê bi awayekî aktîf dixebitin. HDP’iyên ku ligel hemû astengî, zext û qedexeyan jî vê xebatê bi rê ve dibin, mal bi mal digerin û îmzeyan kom dikin. Di çarçoveya xebatên li navçeya Baglar a Amedê tên bi rê ve birin de heya niha 15 hezar îmze hatine komkirin. 

BI ŞEV Û ROJ DIXEBITIN

Hevseroka HDP’ê ya Baglar Sumeyye Kîrîcî, derbarê vê xebata xwe de wiha got: “Me ewil li 110 gundan dest bi vê xebata xwe kir. Dûre li 12 taxên navenda navçeyê me xebata xwe dewam kir. Bi şev û roj me ev xebata xwe berdewam kir. Ligel vê xebatê, di heman demê de me xebatên xwe yên siyasî û rêxistinkirinê jî bi rê ve birin. Li gundan me komîsyon ava kirin. Heya niha me 10 hezar îmze teslîm kirine û niha di destê me de 4 hezar îmze hene. Ez û malbata xwe qet ranewestiyan. Em ketin mal û avahiyan me îmze kom kirin. Li hemû malan me qala îmzeyê kirin.” 

Kîrîcî, bal kişand ser girîngiya ziman û wiha axivî: “Ji bo ku zimanê me bibe zimanê fermî derî bi derî em geriyan û me qala girîngiya kampanyayê kir. Bertekên welatiyan her daîm erênî bûn. Herî zêde dayikan piştgirî dan vê kampanyeya me. Dayikekê dema kampanya îmze kir rondik ji çavên wê bariyan. Ji me got re, ‘Keça min ev zimanê kurdî ye? Dema ku em vê îmze bikin, emê azad bibin? Emê êdî bi awayekê rehet bijîn?’ Hemû malbatên me piştgiriyek mezin dan me.” 

ARMANC 100 HEZAR E 

Kîrîcî, dest nîşan kir ku ew armanc dikin ku li Rezanê 100 hezar îmze kom bikin û wiha got: “Emê vê armanca xwe bi ser bixin. Di hedefa kampanyayê de 1 mîlyon îmze heye. Divê em ne tenê 1 mîlyonî, bi mîlyonan îmze bişînin Meclisê.”

Kîrîcî, banga piştgiriyê li her kesî kir ku kampanyayê îmze bikin.

***

Nûçeyên Eleqedar:

- KAMPANYAYA ÎMZEYAN - Bila Kurdî Bibe Zimanê Fermî û Zimanê Perwerdehîyê 

-  Ji bo ziman kampanyaya îmzeyan dest pê kir

- Dawiya hefteyê çalakiyên ji bo ziman

- Xebatên ji bo Roja Ziman ên îro hatin kirin (19.02.2021)

- 5 saziyan ji bo Roja Ziman daxuyanî da 

- Sedî 33,4: Divê mafê Perwerdehiya Ziman bê dayin û bê parastin

- Hedefa Komîsyona 21’ê Reşemiyê mîlyonek îmze ye