Cîhan Roj

Hin biwêj û derbirîn hene ku xal û radeya dawî nîşan didin:
“Xwîn lê reş bûye.”
“Kezebreşî bûm.”
“Her tişt li ber çavên min reş bû”

Xwîn li Abdullah Demîrbaş reş bûye*. Gelek kes bi hawara xwe êdî kezebreşî bûn. Xuya ye ku tê xwestin her tişt li ber çavê Abdullah Demîrbaş reş bibe!

 “Ziman di devê însanan de peritî.”, “Ziman li însanan reş bû” lê ne xema tu kesî ye, hê jî nahêlin ew ji bo tenduristiya xwe biçe welatekî din!

Ez bêyî rastiyên kes û sazî bi bîr dixin hew gotina “belkî” bi bîra doktoran û saziyên tibî dixim; Gelo gotina “belkî” ji bo we tê çi wateyê? Heger hûn bi mantiqê zanistê û etîka tenduristiyê tevdigerin hûn ji bo çi, nabêjin “belkî” û li gorî rêçikên zanîstî tevnagerin? Xuya ye ku hûn jî xwe li tecrubeyên toreya xwe digirin, lewre jî, hûn di dewsa belkiyê de, qedir li peyva, “teqez” û “mitleq” digirin.

Na, ê min ne bang e, bîrxistin e; ez hew bi rastiyekê dizanim ew jî ev e ku trajediyên wisa ne tên ji bîr kirin ne jî winda dibin; di dema şerê sar de nehiştibûn Rûhî Sû jî ji bo tenduristiya xwe derkeve derve. Hê jî wexta navê Rûhî Sû dibihîzim xema min ne dengê wî ye ne jî fikrên wî ye, lê astengiya ji bo wî, bi min wekî zilm tê, ji alî wîjdanî ve xem dixwim.

Lê ku îhtîmalek be, piştî Abdullah Demîrbaş biçe welatekî din, ji alî moralê ve xurt be û ev rewş bi awayek erênî bandor li nexweşiya wî bike, qey ev ne girîng e? Doktor, ji bo her nexweşiyê, ji her nexweşên xwe re, bi moral bin, dibêjin û wekî şertê herî muhîm didin ber nexweşan. Baş e, em bipirsin, gelo îro moral didin Abdullah an morala wî xirab dikin?

*Di wêneyek Abdullah Demîrbaş de xwîna reş li bedena wî xwe daye der.

cihanacirokan@hotmail.com

***

Nûçeyê eleqedar:

- Ji bo Demirbaş Blogeke piştgiriyê hate vekirin

- Wezîrê Karên Hundir dîsa lêpirsîn li Şaredariya Sûrê vekir