AMED
Şaredariya Sûrê ji bo xizmetek baştir bide welatiyan şertê "Li gel zimanê kurdî divê zimanekî din yê li navçeyê tê axatin jî baş zanibe" danî pêş personelên şaredariyê.
Li ser vê yekê Wezareta Karên Hundir der barê şaredariyê de lêpirsin da destpêkirin.
Şaredarê Sûrê Abdullah Demîrbaş, bertek nîşanî lêpirsîna Wezaretê da û got ku ew helwesta Wezaretê hiqûqî û rast nabînin. Demîrbaş, anî ziman ku di çarçoveya wekheviya xizmetê de bi zimanê îngîlîzî û almanî xizmet tê dayîn wê demê divê bi zimanê kurdî, ermenî û suryanî jî xizmet bê dayîn.

Piştî şaredariya Sûrê di çarçoveya felsefeya xizmeta pir zimanî de dest bi xizmetê kir, Şaredarê Sûrê ji peyvire hate dûrxistin û piştî doz bi dawî bû Demîrtaş bi ser ket û ji dozê beraet kir. Demîrtaş, piştî cara duyemîn wekî şaredar hat hilbijartin ve carê di girtina karker û personelan de di çarçoveya xizmeta pir zimanî de şertê "Li gel zimanê kurdî divê zimaneki din yê navçeyê baş zanibe danî peş karker û personelan. Piştî rojnameyekê di 20'ê gulana 2011'an de nûçeya 'Ji Şaredariya Sûrê şertê kurdî' kir manşet, Wezareta Karên Hundir bi lez û bez der barê Şaredariya Sûrê de lêpirsîn da dest pê kirin. Şaredarê Surê Abdullah Demîrtaş, anî ziman ku di çarçoveya lêpirsînê de li gel belgeyên şertê stendina personelan heta 7 rojan parastin ji wan tê xwestin.

Ji bo zimanê biyanî û YE'ê serbest e, lê ji bo kurdî qedexeye

Şaredarê Sûrê Abdullah Demîrbaş, bertekên tûj nîşanî lêpirsîna Wezareta Karên Hundir da û wiha got: "Şaredarî cih û warê xizmeta civakê ne. Divê bi awayekî herî hêsan û herî baş xizmetê bidin gel. Ji bo vê yekê jî divê bi zimanê gel xizmetê bidin. Li navçeya me Sûrê gelek ziman û bawerî hene. Ji bo şeradarî karibe bi zimanê gel xizmetê bide jî divê personelên şaredariyê jî bi zimanê civakê baş zanibin. Di vê çarçoveyê de me feraseta xizmeta pir zimanî û şertê li gel kurdî herî kêm divê bi zimanekî din yê navçeyê zanibe anî. Li navçeya me bi kurdî, ermenî û suryanî axatin tê kirin. Ji ber vê yekê me jî li gorî feraseta reveberiya herêmî ya demokratîk û krîterên Yekîtiya Ewropayê mafên rewa bikar anî. Çawa ku di çarçoveya wekheviya xizmetê de bi zimanê îngilîzî û almanî xizmet tê dayîn wê demê divê bi zimanê kurdî, ermenî û suryanî jî xizmet bê dayîn. Ji ber vê yekê ez tiştekî bi pirsgirek û asteng nabînim. Ji ber ku zimanî vir bi kurdî, suryanî, ermenî û erebî ye."

'Dibe ku dozê vekin lê xizmet dê bidome'

Demîrbaş, diyar kir ku ew ji felsefeya vê xizmetê bawer dikin û ger ku der barê wan de doz bê vekirin jî dê xizmeta xwe berdewam bikin. Demîrbaş, bilêv kir ku ev helwesta Wezareta Karên Hundir ne hiqûqî ye û siyasî ye.

Şeredariya Sûrê di navbera şîrketên Xizmetên Çandiniyê yên Lîder, Gida Înşaat, Temîzlîk, Xizmeten Civakî, Şîrketa Bazirganî û Pîşesaziyê de protokol îmze kiriye. Di xala protolokê ya 5'emîn de wiha tê gotin: "Li navçeya me beşekê bi tirkî nizanin û fam nakin. Ji bo xizmetek baştir û zûtir divê li gel zimanê kurdî (kurmancî-kirmancî), divê personel bi zimanê suryanî, ermenî û erebî jî baş bizanibin."

Ji DÎHA'yê hatiye girtin