Diyarname

30’emîn Festîvala Fîlman a Navneteweyî ya Stenbolê bi dawî bû. Di çarçoveya festîvalê de li 7 sînemayan bi giştî 528 seans li dar ketin; di bin 21 beşî de ji 52 welatan 231 fîlmên 256 derhênerî hatin nîşandayîn. Bi giştî 150 hezar kes bûn mêvanên festîvalê û li fîlman temaşe kirin.
Seansên fîlman bi giştî li dor sedî 80’ê tije derbas bû, digel vê heft dersên sînemayê, gotûbêj, du konser, xebatek atolyeyê û lidarxistina pêşangehek di vê çarçoveyê de li dar ket.

Ji ber 30 saliya festîvalê hin beşên nû jî hatin li dar xistin. “30 salên wekî fîlmî”, “Di festîvalê de zemanekî: Kifşên SİYAD’ê”, “Stenbol 2010” , her wiha “Bênav” ku bi hevkariya Bîenala Stenbolê hatibû amadekirin bal kişandin.

Beşên “Galayên Akbankê”, “Ji Festîvalên Dinyayê””, “Yên Qet Kevn Nabin”, “Hosteyên Ciwan”, “Dema Belgefîlman a NTV”, “Herêma bi Mayinan”, “Şeydatîya Nîvê Şevê” ve “Menuya Zarokan” bal kişandin. Di festîvalê de ji Tirkiyeyê jî 54 fîlm û belgefîlm jî hatin nîşandayîn ku di nav van de fîlm û belgefîlmên ku derhênerên wan kurd bûn jî hebûn.

Her wiha ji bo 30 salî pirtûkek taybet jî bi navê “30: Ji 20 derhênerî 30 sal” hate amadekirin ku têde gotarên 20 derhênerî ku li ser fîlmên di festîvalê de lê temaşe kirine û gelek di bin bandorê de mane, hene. Yên bixwazin dikarin ji ÎKSV, yan jî ji pirtûkxaneyên Pandora, Robinson, Mepisto û Remziyê peyda bikin.

Derhênerên navdar ên wekî Béla Tarr, Claire Denis, Claude Lanzmann, Leos Carax, derhênerên ciwan ên wekî Ahmad Abdalla, Jim Loach, Ed Gass-Donnelly, Philip Koch, Gérald Hustache-Mathieu û Kadir Balcı mêvanên festîvalê bûn.

Digel rojnamegerên li Tirkiyeyê, ji derveyî Tirkiyeyê jî eleqeyek mezin a rojnamegeran ji bo festîvalê hebû ku li dor 100 endamên çapemeniyê yên biyanî festîval şopandin. Digel kovarê vê sektorê yên wekî Screen International, Variety, Hollywood Reporter, Cineaste, Film New Europe û Positif, rojnameyên wekî Frankfurter Allgemeine Zeitung, Die Tageszeitung, Tagesspiegel, Suddeutsche Zeitung, NY Times, Il Messagero, El Periodico, Elefhterotypia jî li ser festîvalê nûçe çêkirin. Her wiha televîzyonên biyanî yên wekî RAI, Euronews, CNN International, China Central Television jî festîval şopandin.

31’emîn Festîvala Fîlman a Navneteweyî ya Stenbolê dê avrêla 2012’yan de li dar bikeve.