Amed
Cîgira Hevserokên BDP'ê li ser êrîşa li hemberî Îbrahîm Tatlises daxuyaniyeke da çapemeniyê.

Ji roja ku hunermend Tatlises bi êrîşa çekdarî re rû bi rû ma nîqaşa 'kî ev çalakî pêk anî?' her di rojevê de bû. Hin ji çapemeniya Tirkiyeyê jî xwest bûyerê bixe stûyê PKK'ê û wekî delîl jî girtina ndamê Meclîsa BDP'ê Rûşen Mahmûtoglû nîşan dan.

PKK'ê jî BDP'ê jî heta niha çend caran ragihand ku tu eleqeya wan bi bûyerê re nîn e. Vê carê Cîgira Hevseroka BDP'ê Meral Daniş Beştaş tevî Serokê BDP’a Amedê M. Alî Aydin û endamê MP’ê Ahmet Yildirim li avahiya BDP’a Amedê daxuyanî da çapemeniyê. Beştaş got ku ji ber nûçeyên spekulasyonî wan pêdivî bi daxuyaniyê dîtiye û wisa dom kir: “Rûşen Mahmûtoglû ji ber sûîkastê nehatiye girtin ew ji ‘endamtiya rêxistinê’ hatiye girtin. Lê digel vê jî ji bo saziyên çapemeniyê hin nûçeyan amade dikin, ji wan çapemeniyê re dişînin û bi vê yekê jî partiya me wekî hedef tê nîşandayîn."

Meral Daniş Beştaş bibîr xist biryara veşartîbûnê ya dozê heye lê ji bo ku rewş were fêm kirin ew neçar in hin agahiyan bidin. Û dîmen û wêneyên Nîhat Şîmeşek ê ku girtî ye wekî yên Rûşen Mahmûıtoglû be tê nîşandan.

Beştaş destnîşan kir ku sê spartek û lingên vê komployê hene û ev yek lê zêde kir: “Yek jê, ji telefoneke ankesorî ya li nêzî mala Abdûllah Ûçmak li telefona destan a Mahmûtoglû hatiye gerîn, ya duyem di heman rojê de e-mail şandine navnîşana Mahmûtoglû û li ser kalikê dermanekî ku li mala Ûçmak hatiye dîtin e-maila Mahmöûtoglû hatiye nivîsîn.”

Beştaş got ku bersiva telefona ku hatiye kirin nehatiye dayîn, e-maila ku hatiye nehatiye xwendin û navnîşana e-mailê li cem kesek be ev jî têra delîlbûnê nake û wisa got: "Yên ku ev komplo amade kirine bi hûrbînî amade kirine. Dema em li vê dinêrin em dibînin ku AKP li hemberî partiya me her rêyê diceribîne. Armanc ew e ku partiya me bê rûreşkirin û mesele hilbijartin e. AKP bi qasî ku bi ser bûyera Tatlises re buxtanê bavêje partiya me asta wê daketiye.