Diyarname

Wezareta Karên Hundir a Tirkiyeyê vê serê sibê bi kayûmê dest danîn ser şaredariyên HDP'yê yên bajarê Sêrt û Îdirê û navçeyên Misirc û Hawêlê yên Sêrtê û Bajaroka Vartînis a Mûşê.

Piştî biryarê Hevşaredara Sêrtê Berivan Helen Işik, Hevşaredarê Îdirê Yaşar Akkuş, Hevşaredarê Hawêlê Ramazan Sarsilmaz, Hevşaredarê Misircê Baran Akgul û Hevşaredarê Vartînis a Muşê Casim Budak binçav kirin. Polisan di serdegirtina malên hevşaredaran de deriyên malan şikandin. 

HDP'ê di hilbijartina şaredariyan a 31'ê adara 2019'an de 65 şaredarî bi dest xistibûn. Ji wan 6 şaredarî ji ber KHK'ê (Biryarnameya Di Hikmu Zagonê de) mazbatayên wan nedan, man 59. Ji wan 45 şaredarî bi kayûmê hatin desteserkirin.

Sancar: Ev derbe ye

Di vê navberê de Hevserokê HDP'ê Mithat Sancar li ser kayûman axivî û got: "Navê vê yekê eşkere ye: Ev yek derbe ye, ev yek qebûlnekirina demokrasiyê, tunehesibandina vîna gel e. Ev yek baweriya gel a bi demokrasiyê ji holê radike, ev yek derbeya li hemberî hêviya bi hev re jiyînê ye."

Sancar got ku hikumet bi kayûman li hemberî kurdan neyartiyê dike û got: "Kayûm mînaka herî zelal herî dijwar a neyartiya li hemberî kurdan e."
Ji CHP'ê bertek

Cîgirê Serokê Koma CHP'ê Ozgur Ozel, mebûsê CHP'ê Sezgin Tanrikilu û Seroka Rêxistina CHP'ê ya Stenbolê Canan Kaftancioglu ji ser twittera xwe re dijî kayûman derketin. Ozel got ku ev yek dilxweşkirina wekî serdemên derbeyê ye, tunehesibandina vîna gel e. Kaftancioglu jî wisa got: "Fikra derbekaran ku dest datîne ser vîna gel operasyonên xwe yên nîvê şevê didomîne. Bi leşkerên ku peywirdar dike mafê kesên hatine hilbijartin û yên ew hilbijartine binpê dike."