Diyarname
Ji bo keşifkirina berhemên dawî yên wêje û muzîkî yên di zimanê Baskê de Salona Durango "Fûara Muzîk û Pirtûkan" li dar dixe. Mijara fûarê ya îsal erotîzm e û welatê mêvan jî Kurdistan e.

Li Spanyayê, li herêma Vîzcaya ku parçeya bakurê rojavayê herêma xweseriya Bask e, 45’emîn Fûara Muzîk û Pirtûkan ya Durango di navbera 4-8’ê berfanbarê da li dar dixe.

Salona Durango wê derfet bide gelek malbat, komele û saziyan ku berhemên dawî yên bi zimanê Baskî keşif bikin. Li aliyê din jî di amadekirina çarçoveya vê organîzasyonê de li gel konseran û hatina bav hev a nivîskar û weşangeran jî cih digire. Ji bo vê yekê bernameyeke dewlemend hatiye amadekirin.

Guhertinên bingehîn yên di salonê de ji aliyê Komeleya Geredîaga ve hatin eşkere kirin. Li gor agahiyên ku wan dan mijara bingehîn a fûarê erotîzm e û Kurdistan jî wekî welatê mêvan e. Di salona ku 4 hezar m2 de wê 285 stand û 138 pêşangeh bi giştî 505 nûbûyîn nûnertî bikin.

Di fûarê de muzîsyen Îmanol Urbîeta bi keda ku daye zimanê û çanda Baskê û ji ber kariyera wî, wê xelata Argîzaîola bigire. Wê xelat di 4’ê berfanbarê, saet 20.30’an de li Navenda Çandê ya San Agustîn bê dayîn.

Urbîeta ku di sala 1934’an de li Zarautzê ji dayik bûye, bestekarê bi nav û deng ê ku bizimanê bi Baskê muzîka gel gotiye.

Di beşa welatê mêvan de wê panel û gotûbêjên li ser kurdan bêne li dar xistin. Yek ji çalakiyan jî wê ji rojnameya Azadiya Welat Eser Uyansiz beşdar bibe, qala rojnamegeriya kurdî û zor û zehmetiyên li ser wan bîne ziman.

Her wiha Erotîzm ku mijara bingehîn a fûarê ye wê di van rojan de bê nîqaşkirin, li ser xebatên atolyeyê bêne çêkirin, konferans bêne li dar xistin.