Diyarname
Li gelek welatan koronavîsurê bandorek mezin li cîhana sporê jî kir. Li gelek welatan lîstik hatin betalkirin. Me ew dan hev:
Maçên bê temaşevan
Di Lîga Şampiyonan de 12'yê mehê êvarê PSG û Borissa Dortmun tên hemberî hev. Maç bê temaşevan dê bê lîstin. Maça Valencia û Atalanta jî bê temaşevan tê lîstin.
Maçek din a Lîga Şampiyonan di navbera Barselona û Napolî dê roja 18'ê mehê saet 23'yan de bê lîstin. Hat ragihandin ku dê maç bê temaşevan bê lîstin.
Di Lîga Ewropa de jî maç bê temaşevan têne lîstin.Inter û Getafe 13'yê mehê dê bi hev re bilîzin lê bê temaşevan. Her wiha hefteya pêşiya me maça Juventus û Olympique Lyon jî dê bê temaşevan bê lîstin.
Îtalyayê hemû maç betal kirin
Li Îtalyayê maçên lîga mezin Serî A jî di nav de hemû lîstikên sporê bi biryara hikumetê hatin betalkirin. Heta biryarek din hemû maç betal bûn.
Fransayê maça fînalê betal kir
Li Fransayê federasyonê ragihand ku ji ber koronavîsurê ew maça fînalê ya Kûpaya Lîga Fransayê ji bo demek din bi paş ve dixin.
Her wiha Federasyona Fûtbolê ya Fransayê biryar da ku heta 15'ê avrêlê hemû maçên di Lîga 1'emîn û 2'yemîn de bê temaşevan bêne lîstin.
Ji NBA biryarek nû
NBA a Dewletên Yekbûyî yên Amerîkayê (DYA) li dinyayê navdar e. Niha NBA ji ber koronavîrusê biryarnameyek ku ji 10 xalan pêk tê weşand. Li gor biryarnameyê lîstikvanên NBA dê ji bo silavdayînê û pîrozbahiyê dest nedin temaşevanan. Her wiha hin maçan dê bê temaşevan jî bilîzin. Maça yekem a bê temaşevan 12'yê mehê dê di navbera Golden State Warriors û Brooklyn Nets de be.
TFF dişopîne
Federasyona Fûtbolê ya Tirkiyeyê (TFF) ragihand ku ew vîrusê dişopînin û hewce bike dê biryara betalkirin an bê temaşevan lîstinê bide.
Serokê Olympiakosê bi vîrusê ket
Li Yewnanistanê karsaz Evangelos Marinakis ragihand ku ew bi vîrusê ketiye. Marinakis li Yewnanistanê xwediyê klûba Olympiakos û li Îngilistanê xwediyê kilûba Nottingham Forest e. Marinakis wisa got: "Vîrusa Covid-19 hat serdana min jî. Ez dixwazim haya raya giştî pê bixim. Min hemû tevdîr girtine, ez xwe baş hîs dikim. Dixtor çi dibêjin ez li gor wan tevdigerim. Ji bo hemwelatiyên me jî ez vê pêşniyar dikim."
Li Spanya jî maça fînalê hat betalkirin
Li Spanyayê jî ji ber vîrusê maça Fînalê ya Kûpaya Kral hat bi paş ve xistin. Maç gere 18'ê avrêlê di navbera Real Sociedad û Athletic Bilbao de bihata lîstin lê federesyonê maç bi paş ve xist. Maça ku divê li Stada La Cartuja ya Sevilyayê bihata lîstin ji bo 30'yê gulanê hat taloqkirin.
Di vê navberê de federasyon ji bo hemû maçên fûtbolê betal bike dixebite.