AMED
Ji bo ku Girtîgeha Amedê bibe muze berhevkirina îmzeyan didome. Komîsyona Edalet û Lêkolînê ya Girtîgeha Amedê diyar kir ku heta niha li Amedê 20 hezar îmze berhev kirine.

Berî referandûma 12'yê rezbera 2010'an Serokwezîrê Tirkiyeyê Recep Tayyip Erdogan di mîtînga Amedê de got ku ewê Girtîgeha Amedê hilweşînin, amediyan dest bi xebatên parastina girtîgehê û veguhartina wê ya ji bo muzeyê kirin. Ji bo vê yekê Komîsyona Edalet û Lêkolînê ya Girtîgeha Amedê hate avakirin û vê komîsyonê dest bi xebatan kir. Yek ji xabatên komîsyonê dest pê kiribû jî ji bo girtîgeh bibe muzê berhevkirina îmzeyan bû.
Li gor agahiyên dawî yê komîsyonê heta niha hejmara îmzeyên ku berhev kirine gihîştiye 20 hezar î.

Komîsyonê di 18'ê kewçêrê de dest bi berhevkirina îmzeyan kiribû û di van 9 rojan de li Mêrdîn, Riha, Êlih, Mêrsîn û bajarên herêmê statên îmzeyan hatin vekirin û îmze hatin berhevkirin.

Komîsyonê diyar kir ku ji bo girtîgeh bibe mûze ji bilî kampanya îmzeyan ew ê xebatên din jî bimeşînin. Di çarçoveya van xebatan de komîsyon wê li Amedê ofîseke vekin û wê malpereke înternetê bê vekirin û li wê derê jî hem agahî bêne pêşkêşkirin, hem jî îmze bêne berhevkinin.

Berdevkê komîsyonê Abdulganî Alkan li ser xebatan ev agahî dan: "Ev girtîgeh şerma Tirkiyeyê ye. Divê ev girtîgeh bibe muze. Ji ber ku gelek îşkenceyên giran li vir hatin kirin. Mirov li vir hatin kuştin û ciwanan bedena xwe da ber agir. Divê ev dîrok û berxwedan neyê ji bîr kirin. Divê ev îşkence û zilm neyê ji bîr kirin. Ji bo vê yekê jî divê ev girtîgeh bibe muze. Ev îmzeyên ku em kom dikin, em dê ji Komîsyona Meclisa Tirkiyeyê û ji gelek cihên din re bişînin."